سەرچاوەکان ئاماژەیان بەوە کردووە کە هێزەکانی ئیتلاعاتی ئێران لە شاری پاوە هێرشیان کردووەتە سەر ماڵی ڕاشد ئیمامی (هونەرمەند) و هاوژینەکەی شلێر مودیرزادە. ئەم دوو هاوڵاتییە کوردە دوای دەستبەسەرکردنیان بۆ شوێنێکی نادیار گواستراونەتەوە و تا ئێستا هیچ زانیارییەک لەسەر چارەنووس و شوێنی ڕاگرتنیان لەبەردەستدا نییە.
ئاوێنە: بەگوێرەی زانیارییەکان، ئەم دەستبەسەرکردنە بەبێ بوونی هیچ بەڵگەنامەیەکی یاسایی ئەنجام دراوە و سەرەڕای بەدواداچوونی بەردەوامی بنەماڵەکانیان، دەزگا ئەمنییەکان هیچ وەڵامێکیان نەداوەتەوە. جێگای ئاماژەیە کە ئەم دوو هاوژینە پێشتر لە کاتی ناڕەزایەتییەکانی شۆڕشی “ژن ژیان ئازادی”یشدا لەلایەن هێزە ئەمنییەکانەوە دەستبەسەر کرابوون.
سزادانی نەدا دەدەجانی، هونەرمەندی شانۆکاری خەڵکی قوروە
لە لایەکی دیکەوە، دەزگای دادوەریی ئێران لە شاری قوروە، سزای بەسەر نەدا دەدەجانی هونەرمەندی ناسراوی شانۆدا سەپاند. ناوبراو کە لە ناڕەزایەتییەکانی گەلانی ئێراندا دەستبەسەر کرابوو، بە تۆمەتی “گردبوونەوە و پشتیوانی دژی ئاسایشی ناوخۆیی وڵات و تێکدانی ئاسایشی گشتی” سزای سێ ساڵ زیندانیی و دوو ساڵ دوورخستنەوە بۆ شاری نێکشار لە پارێزگای سیستان و بەلووچستان بەسەردا سەپێنراوە.
نەدا دەدەجانی، هونەرمەندی لێهاتووی کورد، خاوەنی چەندین دەستکەوتی هونەرییە، لەوانە:
بەدەستهێنانی خەڵاتی هەڵبژێردراوی بووکەڵەگرتنی شانۆیی.
خەڵاتی یەکەمی دیزاین و دروستکردنی بووکەڵە لە هەشتەمین فێستیڤاڵی شانۆی ناوچەیی خاوەن پێداویستییە تایبەتەکان.
خاوەنی ئەزموونی دیار لە بواری دیزاینەری جلوبەرگ و گریمی تابلۆ و بەرهەمە شانۆییەکان.