لە کاتێکدا ئامادەکارییەکان بۆ سازدانی کۆبوونەوەی لوتکەی چاوەڕوانکراوی نێوان دۆناڵد ترەمپ، سەرۆکی ویلایەتە یەکگرتووەکانی ئەمریکا و عەلی زەیدی، سەرۆک وەزیرانی عێراق لە کۆشکی سپی بەڕێوەدەچن، بەرپرسێکی باڵای ئیدارەی واشنتۆن گرنگترین و سەرەکیترین مەرج و داواکارییەکانی سەرۆکی ئەمریکای بۆ ئیمزاکردنی هەر ڕێککەوتنێک لەگەڵ بەغدا ئاشکرا کرد.
ئاوێنە: بەپێی زانیارییەکانی ئەو بەرپرسە باڵا ئەمریکییە، لە پێشەنگی داواکارییەکانی واشنتۆندا، پێداگرییەکی توند هەیە لەسەر پاراستنی تەواوەتی سەروەریی خاکی عێراق. ئیدارەی ترەمپ ڕوونی دەکاتەوە کە ئەم سەروەرییە پەیوەستە بە توانای بەغدا بۆ بڕیاردانی سەربەخۆ و دوورکەوتنەوەی ڕەها لە هەر جۆرە هەژموون، دەستێوەردان و باڵادەستییەکی کۆماری ئیسلامیی ئێران. بەو پێیەی لە ڕوانگەی ترەمپەوە، هەر حکومەتێک لەژێر کۆنترۆڵ و کاریگەریی تاراندا بێت، هەرگیز ناتوانێت بەرژەوەندییە نیشتمانییەکانی گەلی عێراق بخاتە پێشینەی کار و پلانەکانی خۆیەوە.
هاوشانی پرسی سەروەری، مەلەفی ئەمنی و کۆنترۆڵکردنی گرووپە چەکدارەکان بەشێکی سەرەکی و بێ سازش لە مەرجەکانی سەرۆکی ئەمریکا پێکدەهێنێت. واشنتۆن بە ڕاشکاوی داوای ڕاگرتنی دەستبەجێی سەرجەم ئەو هێرش و چالاکییە سەربازییانە دەکات کە لە ناوخۆی سنوورەکانی عێراقەوە و لەلایەن میلیشیا چەکدارەکانی سەر بە ئێرانەوە ئەنجام دەدرێن.
سەبارەت بە پرۆسەی چەککردنی ئەو گرووپانەش، ئیدارەی ئەمریکا هۆشدارییەکی توندی ئاراستەی بەغدا کردووە و ڕایگەیاندووە کە چیتر بەڵێنی سیاسیی سەر کاغەز و بێکردار قبوڵ ناکات؛ بەڵکو بڕیارەکان و هەڵسەنگاندنەکانی داهاتووی واشنتۆن تەنها و تەنها لەسەر بنەمای "کردار و ئەنجامە پێوراوەکان" دەبن لەسەر زەوی.
سەرچاوەکە ئاماژەی بەوەش کردووە، سەرەڕای ئەوەی دۆناڵد ترەمپ هیوای سەرکەوتنی بۆ عەلی زەیدی خواستووە لە ئەرکی پێکهێنانی حکومەتێکی نوێدا کە پاڵپشت بێت بە ئاوەدانی و دوور بێت لە توندوتیژی و دەستێوەردان، بەڵام هاوکات پەیامێکی ڕوونی پێداوە کە بەردەوامیی هاوکاری و هاوبەشیی داهاتووی نێوان هەردوو وڵات، بە تەواوی بەستراوەتەوە بە ڕادەی جددیبوونی بەغدا لە جێبەجێکردنی کرداریی ئەم بەڵێنانەدا.
ئەم کۆبوونەوە چارەنووسساز و گرنگە لە کاتێکدایە کە سەرۆک وەزیرانی عێراق، لەسەروبەندی گەشتێکی فەرمی هەشت ڕۆژەیدا لەسەرۆکایەتی وەکدێکی باڵای وەزاری، وەبەرهێنەران و خاوەن کۆمپانیاکان گەیشتووەتە واشنتۆن؛ سەردانێک کە تێیدا بڕیارە دۆسیە گەرمەکانی ناوچەکە و پاشەڕۆژی پەیوەندییە سیاسی و ئابوورییەکانی نێوان بەغدا و واشنتۆن یەکلایی بکرێنەوە.