ڕێکخراوی مافی مرۆڤی هەنگاو، ئەمڕۆ یەکشەممە ٢٣ی ئابی ٢٠٢٦، ڕاپۆرتێکی لەبارەی ڕووداوێکی کوشتن لە شاری سنە بڵاو کردەوە کە تێیدا ژنێک بەدەستی هاوژینی پێشووی کوژراوە.
ئاوێنە: بەپێی زانیارییەکانی ڕێکخراوەکە، قوربانییەکە ناوی (ئاتووسا جەعفەری)یە و تەمەنی ٢٧ ساڵە، کە وەک فەرمانبەر لە بەڕێوەبەرایەتیی پۆستەی شاری سنە کاری دەکرد. ڕووداوەکە لە کاتێکدا ڕووی داوە کە ناوبراو سواری ئۆتۆمبێلەکەی بووە و بەرەو شوێنی کارەکەی بەڕێکەوتووە، بەڵام لەسەر شەقام لە دواوە لەلایەن هاوژینی پێشوویەوە هێرشی کراوەتە سەر.
لە بەشێکی دیکەی ڕاپۆرتەکەی هەنگاودا هاتووە، هێرشبەرەکە چەندین چەقۆی لە ئاتووسا جەعفەری داوە، کە یەکێکیان بەر دڵی کەوتووە؛ بەهۆی سەختیی برینەکانی و خوێنبەربوونی زۆرەوە دەستبەجێ گیانی لەدەست داوە.
هەر بەپێی بەدواداچوونەکانی هەنگاو، ئاتووسا جەعفەری چەند ساڵ پێش ئێستا بەهۆی ناکۆکیی خێزانییەوە لە هاوژینەکەی جیا بووبووەوە و لەگەڵ دایکیدا دەژیا. سەرەڕای جیابوونەوەشیان، ناوبراو لە ماوەی ئەم ساڵانەدا بەردەوام ڕووبەڕووی هەڕەشە و ئازارپێگەیاندن بووەتەوە لەلایەن هاوژینی پێشوویەوە. هەروەها ئاماژە بەوەش کراوە کە ئەنجامدەری تاوانەکە دوای ڕووداوەکە لە شوێنی تاوانەکە هەڵاتووە و تا ئێستا لەلایەن هێزە ئەمنییەکانەوە دەستبەسەر نەکراوە.