د. مەزهەر محەمەد ساڵح، راوێژکاری دارایی و ئابووریی عەلی زەیدی، سەرۆکوەزیرانی عێراق، پێشبینی دەکات کە پرۆژەیاسای بودجەی ساڵی ٢٠٢٧ قورس و سەختترین بێت لە مێژووی وڵاتەکەدا. ئەمەش دەگەڕێتەوە بۆ ئەو گوشارە داراییە بەردەوامانە و کاریگەرییە نەرێنییەکانی قەیرانی گەرووی هورمز لەسەر داهات و گەنجینەی گشتیی عێراق.
ئاوێنە: لە لێدوانێکی تایبەتدا بۆ کەناڵی (ئەلجەزیرە)، ئەو راوێژکارە ئاماژەی بەوە کردووە کە تاوەکو قەیرانی گەرووی هورمز کۆتایی نەیەت و پرۆسەی هەناردەکردنی نەوتی عێراق بە قەبارەی تەواوەتیی خۆی دەست پێ نەکاتەوە، تەواوی پلان و پڕۆژەکانی وەبەرهێنان لە وڵاتدا بە هەڵپەسێردراوی دەمێننەوە. ئامانج لەم هەنگاوەش روونکردنەوەی زیاتری قەبارەی داهات و وردکردنەوەی پێشبینییەکانی بودجەیە.
سەبارەت بە پێشینەی کارەکانی حکوومەت لەم قۆناغە هەستیارەدا، د. مەزهەر محەمەد ساڵح روونی کردەوە کە ئەرکی سەرەکیی ئێستا تەنیا بریتییە لە دابینکردنی مووچە، کرێ، خانەنشینی، تۆڕی چاودێریی کۆمەڵایەتی و خەرجییە بنەڕەتییەکان. هاوکات، بەشێک لە خەرجییە ستراتیژییەکانی وەبەرهێنان بەردەوام دەبن، بەتایبەتی ئەو پڕۆژانەی راستەوخۆ پەیوەندییان بە تۆڕەکانی کارەباوە هەیە.
لە چوارچێوەی هەوڵەکان بۆ رێکخستنەوەی دۆخی دارایی، راوێژکارەکەی سەرۆکوەزیران ئاشکرای کرد کە حکوومەت سەرقاڵی داڕشتنی پرۆژەیاسایەکە بە مەبەستی رێکخستنی شێوازی قەرزکردن، وەرگرتنی بەخشین و پەیداکردنی سەرچاوەکانی دابینکردنی پارە.
ئەم پێشهاتانە لە کاتێکدان کە پێشتر لە رێکەوتی ٢٠ـی ئابی رابردوودا، عەلی زەیدی، سەرۆکوەزیرانی عێراق بە فەرمی رایگەیاندبوو کە حکوومەتەکەی سەرقاڵی ئامادەکردنی پرۆژەیاسای بودجەی ٢٠٢٧ـە و بڕیارە لە ئایندەیەکی نزیکدا رەوانەی ئەنجوومەنی نوێنەران بکرێت بۆ پەسەندکردنی.