میدیای نزیک لە پارتی لەزاری سەرچاوەیەکی نێو وەزارەتی دارایی هەرێمەوە بڵاویکردەوە، بڕیارە ناوەڕاستی ئەم هەفتەیە شاندێکی وەزارەتەکە بەمەبەستی گفتوگۆکردن لەسەر پشکی هەرێمی کوردستان لە بودجەی ساڵی 2027 بچێتە بەغدا.

ئاوێنە: ئەمڕۆ شەممە، سەرچاوەیەک لە وەزارەتی دارایی و ئابووریی هەرێمی کوردستان بە میدیای پارتی وت "شاندێکی چوار کەسیی وەزارەتی دارایی، بە مەبەستی گفتوگۆکردن لەسەر بودجەی ساڵی 2027 دەچنە بەغدا. پێشبینی دەکرێت سەردانەکە لە ناوەڕاستی ئەم هەفتەیەدا بێت."

سەرچاوەکە وتیشی "شاندەکە دەچن تاوەکو لەگەڵ وەزارەتی دارایی عێراق گفتوگۆ لەسەر وردەکاریی پشکی هەرێمی کوردستان لە بودجەی 2027 بکەن."

سەبارەت بەو بڕە پارەیەی هەرێمی کوردستان بۆ ساڵی داهاتوو پێویستیەتی، سەرچاوەکە رایگەیاند "بۆ بودجەی ساڵی داهاتوو، پێویستمان بە نزیکەی 23 ترلیۆن دینارە بۆ دابینکردنی مووچە و بودجەی کارپێکردن؛ هەروەها بۆ بودجەی وەبەرهێنانیش پێویستمان بە زیاتر لە پێنج ترلیۆن دینارە".

سەردانی ئەو شاندە دوای ئەوە دێت، کە هەرێمی کوردستان لە کۆتاییەکانی مانگی ئابی رابردوو، پڕۆژەی پشکی بودجەی ساڵی 2027ی رەوانەی بەغدا کرد.