دادگای لێکۆڵینەوەی کەرخ لە بەغدا فەرمانی دەستبەسەرداگرتنی بەسەر گشت ماڵ و موڵکی گوازراوە و نەگوازراوەی تۆمەتباری هەڵاتوو، ئۆمێد حاجی ئەحمەد، دەرکرد. بڕیارەکە دوای دەرچوونی فەرمانی دەستگیرکردنی ناوبراو دێت بەپێی مادەی (٤٣٠) لە یاسای سزادانی عێراقی ژمارە ١١١ی ساڵی ١٩٦٩ی هەموارکراو، و دادگاش داوای گرتنەبەری ڕێکاری یاسایی و فەرمی پێویست دەکات بۆ جێبەجێکردنی ئەم بڕیارە.
ئاوێنە: بەپێی زانیارییە یاساییەکان، تۆمەتبار ئۆمێد حاجی ئەحمەد (ناوی دایکی: هەمین ئەحمەد)، لەدایکبووی ساڵی ١٩٧٦ە و دانیشتووی شاری سلێمانییە لە هەرێمی کوردستان.
ئەو تۆمەتانەی ئاراستەی ناوبراو کراون پەیوەستن بە فرۆشتن و بەبازاڕکردنی نەوتی ئێران لەسەر ئاستی بازاڕە نێودەوڵەتییەکان بەناوی نەوتی عێراقەوە. تۆمەتەکان ئاماژە بەوە دەکەن کە پڕۆسەکە لە ڕێگەی ساختەکردنی بەڵگەنامە فەرمییەکان و پێدانی بەرتیل بە بەرپرسانی حکوومەتی عێراق ئەنجام دراوە، ئەمەش لەڕێی سەرپەرشتیکردنی تۆڕێک لە کۆمپانیا کە شێوازی تێکەڵکردن و گواستنەوەی بارەکانیان لە کەشتییەکەوە بۆ کەشتییەکی تر بەکار هێناوە بە مەبەستی شاردنەوە و چەواشەکردنی سەرچاوەی ڕاستەقینەی نەوتەکە.
پێشتریش، وەزارەتی گەنجینەی ئەمەریکا ناوی ئۆمێد حاجی ئەحمەد (کە بە سالم سەعید ئەحمەدیش ناسراوە) خستبووە لیستی سزاکانییەوە بە تۆمەتی تێوەگلان لە قاچاخچێتیکردن بە نەوتی ئێرانەوە. لە ڕاگەیەنراوەکەی وەزارەتی گەنجینەی ئەمەریکادا جەخت لەوە کرابووەوە کە ناوبراو پەیوەندییەکی بەهێزی لەگەڵ ژمارەیەک لە سیاسەتمەداران و ئەندامانی پەرلەمانی عێراق هەبووە.