درەنگانی شەوی ڕابردوو لە گەڕەکی شەریکە تاریقی سەر بە پارێزگای کەرکووک، ژنێکی بە ڕەگەز عەرەب بە ناوی (ن.م) کە تەمەنی تەنیا ١٧ ساڵە، بەهۆی بەرکەوتنی بە ئاگر و بە ڕێژەیەکی بەرزی سووتاوی گەیەندرایە نەخۆشخانە، دواتریش بەهۆی سەختیی برینەکانیەوە لە نەخۆشخانە گیانی لەدەستدا.
ئاوێنە: بەپێی زانیارییەکان، قوربانییەکە بەر لەوەی گیان لەدەست بدات، لە لێدوان و گوتەکانیدا سکاڵای فەرمی لە دژی هاوسەرەکەی تۆمار کردووە و تۆمەتباری کردووە بەوەی ئاگری تێبەرداوە. لەسەر بنەمای ئەو سکاڵایە، دەستبەجێ هێزە ئەمنییەکان هاوسەری قوربانییەکەیان دەستگیر کردووە و لێکۆڵینەوە لە وردەکاریی ڕووداوەکە بەردەوامە.
لە ڕوانگەی چاودێران و یاساناسانەوە ئەم ڕووداوە لە کاتێکدایە کە توندوتیژی دژی ژنان وەک دیاردەیەکی بەردەوام لە کۆمەڵگەدا دەبینرێت، کە ڕەگ و ڕیشەکەی دەگەڕێتەوە بۆ چەندین هۆکاری کۆمەڵایەتی، ئابووری و کەموکوڕی لە بواری یاساییدا. چاودێران ئاماژە بەوە دەکەن کە لاوازی لە جێبەجێکردنی یاساکان و نەبوونی لێپرسینەوەی پێویست و توند، وا دەکات جۆرێک لە هەستی بێسزایی لای ئەنجامدەرانی ئەم جۆرە تاوانانە دروست ببێت.
بەپێی ڕاپۆرتی ڕێکخراوەکانی داکۆکیکار لە مافەکانی ژنان و بۆچوونی توێژەرانی کۆمەڵایەتی، چەندین فاکتەری دیکە هەن کە ڕێگرن لە گەیشتنی تەواوەتی کەیسەکان بە دادگا؛ لەوانە ترسی قوربانییان لە کاردانەوەی کۆمەڵگە و تۆڵەسەندنەوە، کەمیی هۆشیاریی یاسایی لەناو بەشێک لە هاووڵاتییاندا، شانبەشانی نەبوونی چەترێکی تۆکمەی پشتگیریی دەروونی و کۆمەڵایەتی بۆ ڕزگاربووانی توندوتیژی. ئەم هۆکارانە هاندەرن بۆ ئەوەی زۆرێک لە ژنان لە هەمان ژینگەی پڕ لە مەترسیدا بمێننەوە و ڕێگری لە لێپرسینەوەی یاسایی دروست لە کەیسەکانیاندا دەگرن.