د. هێمن میرانی، بەڕێوەبەری گشتیی دیوانی وەزارەتی ناوخۆی حکومەتی هەرێمی کوردستان، تیشکی خستە سەر ئەو ئاستەنگ و بەربەستانەی کە لە بەردەم جێبەجێکردنی پڕۆژە خزمەتگوزارییەکان و یەکسانیی کارگێڕیدا لە ناوچە جیاوازەکانی هەرێم دروست بوون. ناوبراو ئاماژەی بەوە دا کە جیاکارییەک لە جێبەجێکردنی بڕیارەکاندا لە نێوان پارێزگاکانی هەرێمدا هەیە و ڕوونی کردەوە کە لە کاتێکدا هەولێر و دهۆک بەرەو سەردەمی دیجیتاڵ هەنگاو دەنێن، لە سلێمانی و هەڵەبجە هەمان بڕیار و رێکار جێبەجێ ناکرێن.
ئاوێنە: بەڕێوەبەری گشتیی دیوانی وەزارەتی ناوخۆ جەختی لەوە کردەوە کە ناکۆکییە سیاسییەکان گەیشتوونەتە ئەو ئاستەی کە خزمەتگوزارییە دیجیتاڵییەکان بۆ هاوڵاتییان لە سنووری سلێمانی و هەڵەبجە بپەکێنن. لەم چوارچێوەیەدا، ئاشکرای کرد کە یەکێتیی نیشتمانیی کوردستان بە فەرمی ڕێگری دەکات لەوەی تابلۆی ئۆتۆمبێلەکانی پارێزگای سلێمانی و هەڵەبجە بخرێنە ناو پڕۆگرامی (KRDPASS)ـەوە. بە وتەی د. هێمن میرانی، ئەم ڕێگرییە هۆکارێکی تەکنیکی نییە، بەڵکو بڕیارێکی سیاسییە و دەبێت هۆکارەکەی لە بەرپرسانی یەکێتیی بکرێت، چونکە بەهۆیەوە شۆفێرانی سنووری سلێمانی و هەڵەبجە لەو خزمەتگوزارییە بێبەش کراون کە ڕێگەیان پێدەدا لە ڕێگەی مۆبایلەکانیانەوە سزا داراییەکانیان ببینن و بە شێوەی ئەلیکترۆنی بیاندەن، لە کاتێکدا شۆفێرانی هەولێر و دهۆک لەو ئاسانکارییە سودمەند دەبن.
سەبارەت بە دۆسیەی دەستبەسەرداگرتنی ئۆتۆمبێلە بێسەرەتاکانیش، د. هێمن میرانی ڕەتی کردەوە کە جێبەجێنەکردنی بڕیارەکە لە سنووری سلێمانی، هەڵەبجە، گەرمیان و ڕاپەڕین پەیوەندی بە کەمتەرخەمیی تیمەکانیانەوە هەبێت. ناوبراو ستاییشی ئاستی پیشەیی تیمەکانی ناوچەکەی کرد و ڕایگەیاند کە ئەوان باشترین تیمن و بەبێ جیاوازی کار دەکەن، بەڵام دۆخی سیاسیی و ئەمنی لەو ناوچانەدا جیاوازە و بووەتە ڕێگر لەبەردەم جێبەجێکردنی یاسا و بڕیارەکان بە شێوەیەکی یەکسان.