بەپێی ڕاگەیەندراوێکی وەزارەتی داراییی عێراق، پرۆسەی دابەشکردنی شایستە دارایییەکانی فەرمانبەران بۆ مانگی ئاب بەردەوامیی هەیە و تا ئەم کاتە 80٪ی مووچەخۆران شایستەکانی خۆیان وەرگرتووە.
ئاوێنە: هەرچەندە پرۆسەی دابەشکردنی مووچە لە سەرجەم وەزارەتەکان و دەستەکاندا جێبەجێ کراوە، بەڵام لە چوارچێوەی بەشێک لە وەزارەتەکاندا هێشتا ژمارەیەک بەڕێوەبەرایەتی ماونەتەوە کە مووچەیان پێ نەدراوە؛ بەپێی پلانەکەش بڕیارە لە ئەمڕۆوە تا ڕۆژی پێنجشەممە مووچەی ئەو بەڕێوەبەرایەتییانەش بە تەواوی دابەش بکرێت و دۆسیەکە بۆ ئەم مانگە دابخرێت.
سەبارەت بە شایستە دارایییەکانی فەرمانبەرانی هەرێمی کوردستان، وەزارەتەکە ئاماژەی بەوە کردووە کە ڕێکارەکانی تایبەت بە ناردنی مووچەی هەرێم ڕاستەوخۆ دوای تەواوبوونی پڕۆسەی دابەشکردنی مووچەی سەرجەم فەرمانبەرانی عێراق دەست پێ دەکات. هاوکات دیاریکردنی وادەی کۆتایی و کاتی خەرجکردنەکە پەیوەستە بە خێراییی جێبەجێکردنی مامەڵە ئیدارییەکان و قۆناغە وردبینییە دارایییەکان لەنێوان هەردوولادا.