وەزارەتی سامانە سروشتییەکان لە چوارچێوەی پێداویستییەکانی هەرێمی کوردستان بۆ سووتەمەنی، داوا لە بەغدا دەکات ڕۆژانە 50 هەزار لیتر بەنزینی فڕۆکەی بۆ بنێرێت.

ئاوێنە: ئەمڕۆ سێشەممە، نووسراوێکی وەزارەتی سامانە سروشتییەکان بڵاوکرایەوە کە دەربارەی پێداویستییەکانی هەرێمی کوردستان سەبارەت بە بەرهەمە نەوتییەکان و چارەسەرکردنی قەیرانی بەنزین و نەوت ئاڕاستەی لیژنە تایبەتەکەی نەوت و گازی پەرلەمانی عێراقی کردووە.

لە نووسراوەکەدا وەزارەتی سامانە سروشتییەکان پێداویستییەکانی هەرێمی کوردستانی بەم شێوەیە دەستنیشان کردووە؛

زەیتی سووتەمەنی (HFO) بۆ وێستگەکانی کارەبای هەرێم: (٣,٢٥٠) تۆنی ڕۆژانە

زەیتی گاز (Diesel) بۆ وێستگەکانی کارەبای هەرێم: (١,٩٥٠,٠٠٠) لتر ڕۆژانە

گازی شل (LPG): (٢,٠٠٠) تۆن ڕۆژانە

بەنزین (Gasoline): (٧,٠٠٠,٠٠٠) لتر ڕۆژانە

سووتەمەنی فڕۆکە (Jet Fuel): (٥٠,٠٠٠) لتر ڕۆژانە

نەوتی سپی (Kerosene): (٥٦٣,٥٠٠,٠٠٠) لتر ساڵانە.

وەزارەتی سامانە سروشتییەکان جەختی کردووەتەوە کە ئەم بڕانە بەپێی خەمڵاندن و نووسراوی فەرمیی کۆمپانیای دابەشکردنی بەرهەمە نەوتییەکان دیاریکراون و جیاواز لەم پێداویستییانە، هەرێمی کوردستان پێویستی بە دابینکردنی سووتەمەنییە بۆ کەرتی پیشەسازی، کارگەکان، مۆلیدەکان و بەکارهێنانی ڕۆژانەی هاووڵاتییان تاوەکو ڕێگری لە هەر قەیرانێکی سووتەمەنی بکات.

ئەم وەڵامەی سامانە سروشتییەکان بۆ ئەو لیژنەیەی پەرلەمانی عێراقە کە سەبارەت بە 50 هەزار بەمیل نەوتەکەی هەرێمی کوردستان پێکهێنراوە.