بەڕێوەبەرایەتی گشتی کار و دەستەبەری کۆمەڵایەتی هەرێم قەدەغەکردنی بڵاوکردنەوەی وێنە و ڤیدیۆی خزمەتگوزاری (کرێکاری بیانی) راگەیاند.
ئاوێنە: بەشی راگەیاندنی بەڕێوەبەرایەتی گشتی کار و دەستەبەری کۆمەڵایەتی هەرێمی کوردستان لەپێگەی خۆی بڵاویکردەوە، بەپێی نوسراوی بەڕێوەبەرایەتیان بە ژمارە (١١٧١١ لە ٢٠٢٦/٩/٣)، بڵاوکردنەوەی وێنە و ڤیدیۆی لەگەڵ کرێکارانی بیانی خزمەتگوزاری ماڵان قەدەغەکراوە.
ئەوەش ئاشکراکراوە "ئەم بڕیارە بۆ ئەوەیە کە وێنە و ڤیدیۆی ئەم کرێکارانە بەبێ ڕەزامەندی و بە مەبەستی بڵاوکردنەوە لە تۆڕە کۆمەڵایەتییەکان بەکارنەهێنرێت و کەرامەت و تایبەتمەندییان نەبێتە بابەتی ناوەڕۆکی سۆشیال میدیاو بازرگانی ئەلیکترۆنی".
بەڕێوەبەرایەتی کار ئەووشی ئاماژە پێداوە، کە کرێکارانی بیانی خزمەتگوزاری ماڵان، هەرچەندە لە وڵاتێکی دیکەوە هاتوون، بەڵام مافی مرۆیی و کرێکارییەکانیان هەمان ئەو مافانەن کە دەبێت بۆ هەر کرێکارێکی تر ڕەچاو بکرێت، "نابێت جیاوازیی نەتەوە، زمان یان جۆری کار ببێتە هۆی پێشێلکردنی کەرامەت و تایبەتمەندییان".
ئەوەش هاتووە "ئەم هەنگاوە پەیامێکی ڕوونە کە نابێ وێنە و ڤیدیۆی کرێکار ببێتە کەرەستەی ڕیکلام، گاڵتە، ناوبانگ دروستکردن یان بەرنامەی سۆشیال میدیا".
راشیگەیاندووە "پاراستنی مافی کرێکار تەنها بە پارەدان و دابینکردنی کار کۆتایی نایەت، بەڵکو پاراستنی کەرامەت و تایبەتمەندی کەسی مافی سەرەکیە".
"نابێ لەدەرەوەی پەیوەندی کار کە بەپێی گرێبەست ڕێکخراوە کرێکار ناچار بکرێت بۆ بابەت و کارێکی تر. بۆ ئەو مەبەستە بەڕێوەبەرایەتییە پەیوەندیدارەکان ڕێوشوێنی یاسایی لەگەڵ سەرپێچیکاران بگرنە بەر". بەڕێوەبەرایەتی کار وای نوسیوە
ئەوەش خراوەتەروو، کە ئامانج لەو کارەیە ئاگادارکردنەوەی پاراستنی مافی مرۆڤ و شکۆمەندی کریکارانی خزمەتگوزاری ماڵانە، ڕێگری لە بەکارهێنانی نایاسایی وێنە و ڤیدیۆکانیان بۆ مەبەستی بازرگانی و ڕیکلامی.