لە بەردەم بەڕێوەبەرایەتی گشتی تەندروستی سلێمانی، ژمارەیەک لە پزیشکانی دانەمەزراو بە هاوبەشی لەگەڵ بەشێک لە پزیشکانی دامەزراو، گردبوونەوەیەکی ناڕەزایەتییان ئەنجامدا. لە گردبوونەوەکەدا یاداشتنامەیەکی ناڕەزایەتی ئاڕاستەی هەردوو حکومەتی فیدراڵ و حکومەتی هەرێمی کوردستان، هاوکات فراکسیۆنە کوردستانییەکانی ناو پەرلەمانی عێراق کرا.
ئاوێنە: داستان بەشارەت، نوێنەری دەرچووانی دانەمەزراو لە لێدوانێکدا ناوەڕۆکی داواکارییەکانی خستەڕوو و ئاماژەی بەوە کرد، زیاتر لە ساڵێک و دوو مانگە دەرچووانی بەشە پزیشکییەکان لە ساڵانی خوێندنی ٢٠٢٥ و ٢٠٢٦ لە مافی بنەڕەتی خۆیان کە دامەزراندنی فەرمییە بێبەشکراون. بە گوتەی ناوبراو، ناڕەزایەتی و چالاکییە مەیدانییەکانیان بەردەوامی دەبێت تا ئەو کاتەی وەڵامێکی فەرمی و کۆنکرێتی سەبارەت بە پرۆسەی دامەزراندنیان لە لایەنە پەیوەندیدارەکانەوە پێدەگات.
لە بەشێکی دیکەی یاداشتنامەکەدا داواکراوە لە دانیشتن و کۆبوونەوەکانی نێوان لیژنە داراییەکانی بەغدا و هەولێر، فشارەکان چڕبکرێنەوە بە ئامانجی جێگیرکردنی پلەی وەزیفی و ڕاژەی دارایی دەرچووانی پزیشکی لە پڕۆژەیاسای بەشە بودجەی ساڵی ٢٠٢٧دا، ئەمەش بە پشتبەستن بە یاسای پلەبەندی پزیشکی ژمارە ٦ـی ساڵی ۲۰۰۰ و دوورخستنەوەی ئەم پرسە لە هەر ململانێ و کێشەیەکی سیاسی.
پزیشکانی ناڕازی ڕایانگەیاند ئەگەر داواکارییەکانیان لە چوارچێوەی بەشە بودجەی گشتی عێراقدا جێبەجێ نەکرێت، پێویستە ئەنجومەنی وەزیران و وەزارەتی تەندروستی حکومەتی هەرێم بەرپرسیارێتی تەواو لە ئەستۆ بگرن و میکانیزمێکی خێرا و بەپەلەی دارایی بۆ چارەسەرکردنی پرسی دامەزراندنیان بدۆزنەوە. هەروەها ئامادەیی خۆیان دەربڕی بۆ هەر هەنگاوێک کە مەبەست لێی ڕێکخستنەوەی سیستمی پلەبەندی پزیشکی بێت، بە مەرجێک پارێزگاری لە مافە سەرەکی و بنەڕەتییەکانیان بکرێت.