سەرۆکی رەوتی هەڵوێست ئاشکرایکرد، ١٠ تاوەری ٢٢ نهۆمی لە چاڤیلاند دروست دەكرێت، کە تیایدا ٧٦ دووكان كە قازانجەكەی زیاتر لە ٢٤٩ ملیۆن دۆلارە لەخۆ دەگرێت، دەشڵێت "سەرۆكایەتی شارەوانی سلێمانی بەفەرمی بڵاویكردووەتەوە دروستکردنی ئەو تاوەرانە".
ئاوێنە: ئەمڕۆ شەممە، عەلی حەمەساڵح بڕیاردەری رەوتی هەڵوێست لە پێگەی فەرمی خۆی نوسراوێکی بڵاوکردووەتەوە و تیایدا هاتووە "ئەنجومەنی شارەوانی سلێمانی یاسا شکێنیەکی گەورە بۆ ڕێککەوتنێکی سیاسی کرد. من دژی ڕێککەوتنی نەوەی نوێ و یەکێتی نیم.. بەڵام ناکرێ ئەندامانی ئەنجومەنی شاروانی سلێمانی ئەم یاسا شکێنیە بکەن!".
وتیشی "ئێوە دوو جار دژ بوون چاڤیلاند بکرێتە پرۆژەی بازرگانی و نیشتەجێبوون دەتانوت؛ یاسا ڕێگا نادات، بەڵام جاری سێیەم لەژێر فشار کردتان.. خۆتان وتتان: بەیاسا سەوزایی ناکرێتە پرۆژەی بازرگانی و نیشتەجێبوون! ئێستا چۆن کرا!!".
وەک بڕیاردەرەکەی هەڵوێست دەڵێت "بزنسێک بەیاسا شکێنی (٢٥٢ ملیۆن) دۆلار قازانج.. یەک؛ ١٠ تاوەری ٢٢ نهۆمی لە چاڤیلاند! قازانج (٩٢ ملیۆن) دۆلار! دووەم، تاورێکی بازرگانی لەسەر ڕووبەری (٣٤١٤) مەتر دووجا و ٧٦ دوکان ڕووبەری هەر یەکەیان (٢٠٠ ) مەتر بۆ (٦٩٠) مەتر!! قازانج نزیکەی (١٠٦) ملیۆن دۆلار!".
لەبارەی خاڵی سێیەمەوە، عەلی حەمەساڵح رونیشیکردەوە "سەوزایەکانی گوندی ئەڵمانی بکرێتە پرۆژەی بازرگانی!".
وتیشی "هەر تاوەرێک لە گوندی ئەڵمانی دوو نهۆمی دیکەی لەسەر زیادبکرێت!! قازانجی ئەم بەشەش نزیکەی (٥٣ ملیۆن) دۆلار.. کۆی ئەم پرۆژانەش ٥١٪ بە ٤٩٪ لەگەڵ ئیدارەی گشتی یەکێتی دەکرێت. خۆتان دەزانن ئەمە یاسا شکێنیەو منیش هەمووتان دەدەم بەدادگا...".