مستەفا عەبدوڵا، سەرۆکی فراکسیۆنی یەکگرتو لە پەرلەمانی کوردستان، ڕەخنە لە سیاسەتە نەوتییەکانی حکومەتی هەرێم دەگرێت و ڕایدەگەیەنێت کە حکومەت لە ئاست چارەسەرکردنی قەیرانی بەنزیندا دەستەوەستانە، چونکە کەرتی سوتەمەنی ڕادەستی کۆمپانیا حزبییەکان کراوە.

ئاوێنه‌: مستەفا عەبدوڵا، سەرۆکی فراکسیۆنی یەکگرتو لە پەرلەمانی کوردستان سەبارەت بە جێبەجێکردنی سیستەمی تاک و جوت بۆ دابەشکردنی بەنزین، به‌ میدیای حزبه‌كه‌ی راگه‌یاند، ئەم ڕێکارانە نابنە چارەسەری ڕیشەیی و تەنیا وەک "موسەکن و هێورکەرەوەیەک" وان بۆ قەیرانەکە، لە کاتێکدا نرخی بەنزین هەر بە بەرزی ماوەتەوە و باری دارایی هاوڵاتیانی گران کردوە.

سەرۆکی فراکسیۆنی یەکگرتو هۆکاری سەرەکی قەیرانەکەی بۆ ئەوە گەڕاندەوە کە حکومەتی هەرێم هەمو جومگەکانی کەرتی نەوت و سوتەمەنی (دەرهێنان، پاڵاوتن و دابەشکردن)ی ڕادەستی کەرتی تایبەت و کۆمپانیا حزبییەکان کردوە.

وتیشی: "حکومەت هیچ ڕۆڵێکی نەماوە و تەنیا چاودێرییەکی کەم دەکات، لە ڕاستیدا حکومەت بوەتە کرێچی کۆمپانیاکان، ئەوەش وایکردوە قازانجی کۆمپانیاکان لە پێش خزمەتگوزاری هاوڵاتیانەوە بێت."

مستەفا عەبدوڵا راشیگەیاند "لە بەغدا حکومەت خۆی سەرپەرشتی پاڵاوگەکان و کەرتی سوتەمەنی دەکات، بۆیە نرخەکان جێگیرن و لە بەرژەوەندی هاوڵاتیانن، بەڵام لە هەرێم کۆمپانیا حزبییەکان بڕیار لەسەر نرخ و جۆری سوتەمەنی دەدەن."

سەبارەت بە هەوڵەکانی پەرلەمانی عێراق بۆ چارەسەری ئەم کێشەیە، ناوبراو ئاشکرایکرد کە لیژنەیەکی پەرلەمانی لە بەغدا خەریکی لێکۆڵینەوەن لەو "ستەمەی لە سوتەمەنی هەرێمدا دەکرێت".

ئاماژەی بەوەش کرد کە چارەسەری ڕاستەقینە لەوەدایە کە حکومەتی هەرێم بەجدی لەگەڵ بەغدا ڕێکبکەوێت بۆ دابینکردنی پشکی هەرێم لە سوتەمەنی یان راده‌ستكردنی ته‌واوی ئه‌و 50 هه‌زار به‌رمیله‌ یان زیادکردنی بڕی ئەو 50 هەزار بەرمیلە، بەڵام بە مەرجێک چاودێرییەکی وردی حکومەتی فیدراڵی لەسەر بێت بۆ ئەوەی بگاتە دەستی هاوڵاتیان.

ئه‌و هۆشداریشی دا کە سوتەمەنی ژێرخانی سەرەکی جوڵەی بازاڕە، بەرزبونەوەی نرخەکەی کاریگەری ڕاستەوخۆی لەسەر گرانبونی هەمو پێداویستییەکانی تری ژیانی هاوڵاتیان هەیە و پێویستە حکومەت لەم سیاسەتە چەوتەی ئێستای پاشەکشە بکات.