بەپێی نوێترین پێشبینییەکانی بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان، لە سبەینێوە گۆڕانکاری لە کەشوهەوای ناوچەکەدا ڕوودەدات. هەرێمی کوردستان دەکەوێتە ژێر کاریگەرییەکی لاوازی بەرزەپاڵەپەستۆی دەریای سوور، ئەمەش دەبێتە هۆی دابەزینی بەرچاوی پلەکانی گەرما، بە جۆرێک پێشبینی دەکرێت تا کۆتایی ئەم مانگە و سەرەتای مانگی داهاتوو، پلەکانی گەرما بە تێکڕای (٦ بۆ ٨) پلەی سیلیزی نزم ببنەوە.
ئاوێنە: لە لایەکی دیکەوە، پێشبینییەکان ئاماژە بەوە دەکەن کە لە نیوەڕۆی ڕۆژی چوارشەممەی داهاتووەوە، هەرێمی کوردستان دەکەوێتە ژێر کاریگەریی بەرزەپاڵەپەستۆی دەریای سپیی ناوەڕاست. سەرەتای کاریگەرییەکە لە سنووری پارێزگای دهۆک بە دەرکەوتنی ئاسمانی نیمچەهەور دەستپێدەکات و لە ڕۆژی پێنجشەممەدا کاریگەرییەکەی بەهێزتر دەبێت. لەم ڕۆژەدا شەپۆلێکی بارانبارین لە پارێزگای دهۆکەوە دەستپێدەکات، پاشان بە ڕێژەیەکی کەمتر ناوچەکانی پارێزگای هەولێر دەگرێتەوە و بە شێوەیەکی لاوازتریش دەگاتە سنووری پارێزگای سلێمانی.
هاوکات لەگەڵ پێشبینییە فەرمییەکاندا، ئاراس جەبار، شارەزای بواری کەشناسی زانیاری زیاتری خستەڕوو و ڕایگەیاند؛ سبەینێ دووشەممە، لە کاتەکانی نێوان نیوەڕۆ بۆ ئێوارەدا، ئەگەری دروستبوونی هەورەبروسکە و بارینێکی کەمی کورتخایەن لە ناوچە شاخاوییەکانی پارێزگای دهۆک و ئیدارەی سەربەخۆی سۆران هەیە.
سەبارەت بە بڕی بارانبارینی پێشبینیکراو لە کاتی هاتنی ئەم شەپۆلەدا بۆ سەر پارێزگاکانی هەرێم، ئامارەکان بەم شێوەیەی خوارەوە دەبن:
پارێزگای دهۆک: ٢ بۆ ٣ ملم
پارێزگای هەولێر: ١ بۆ ٢ ملم
پارێزگای سلێمانی: ٠.٥ بۆ ١ ملم