بەڕێوەبەرایەتی گشتی کارەبای سلێمانی و هەڵەبجە لە وەڵامی وتەکانی سەرۆکی حزبی سۆسیال دیموکراتی کوردستان سەبارەت بە قەرزی پارەی کارەبای گوڵەخانە، ئاماژە بەوەدەکات کە ناوبراو ٧ ساڵە پارەی كارەبای نەداوەو بڕەكەشی "٧٦ ملیۆن دینارە نەك ١٠٠ ملیۆن دینار".
ئاوێنە: بەڕێوەبەرایەتی گشتی کارەبای سلێمانی و هەڵەبجە لە روونکردنەوەیەکی فەرمیدا ئاشکرایکرد "پارەكە ٧٦ ملیۆن دینارە نەك ١٠ ملیۆن دینار و بەشێکی زۆری ئەو پارەیە قەرزی کۆنی کارەبای پێش جێبەجێکردنی پڕۆژەی رووناکییە؛ بەو پێیەی گوڵەخانە دواین جار ٧ ساڵ لەمەوبەر پارەی کارەبای داوە، بۆیە بەشێکی بەرچاو لەو بڕە پارەیە قەرزی کەڵەکەبووی ئەو ماوە درێژەیە".
رونیشیکردەوە "کەناڵی تەلەفزیۆنی و بارەگای سەرەکییان لە شاری سلێمانی قەرزداری کارەبان، بە شێوەیەک کە بارەگا سەرەکییەکەیان دوایین جار لە ساڵی ٢٠٠٢دا پارەی کارەبای داوە".
ئەوەش هاتووە "تیمەکانی کارەبا چەندینجار بۆ پشکنین و بەدواداچوونی پێوەرەکان سەردانی ئەو شوێنانەیان کردووە، بەڵام بەردەوام رێگری لە تیمەکانمان کراوە".
بەڕێوەبەرایەتی گشتی کارەبای سلێمانی و هەڵەبجە دووپاتیان کردەوە، پشکنینی وردی پسوولەکان هیچ جۆرە هەڵەیەکی لە بڕە تۆمارکراوەکاندا نەدۆزیوەتەوە؛ "بۆیە جێی داخە لەگەڵ بوونی ئەم هەموو بەڵگە و زانیارییە راست و دروستانەدا، لایەنی گوڵەخانە بابەتەکە وەک نادادپەروەری لە میدیاکاندا باس دەکات".
ئەوەش لەکاتێکدایە، محەمەد حاجی مەحمود بە کەناڵی فەرمی حزبەکەی وت، ئێمە لە گوڵەخانە ١٠٠ ملیۆن دینار "پارەی کارەبامان بۆ هاتووەتەوە گوناحمان چیە وامان لەگەڵ دەکەن"، راشیگەیاند، "هاتوون سەعات بۆ بیر دادەنێن و سەرانە وەردەگرن".