سه‌رۆكی ده‌زگای جێبه‌جێكردن له ده‌سته‌ی راگه‌یاندن و گه‌یاندنی عێراق رایده‌گه‌یه‌نێت كه كۆمپانیای كۆڕه‌ك تیلیكۆم به دو مه‌رج ده‌توانێت كاربكات و جه‌ختیش ده‌كاته‌وه كه دۆسیەی کۆڕەک تیلیكۆم دۆسیه‌یه‌كی ته‌واو ته‌كنیكی و داراییه‌و سیاسی نییه.
ئاوێنه: به‌پێی راگه‌یه‌ندراوێكی ده‌سته‌كه، به‌لیغ ئه‌بو كه‌له‌ل، سه‌رۆكی ده‌زگای جێبه‌جێكردن له ده‌سته‌ی راگه‌یاندن و گه‌یاندنی عێراق، ئه‌مڕۆ چوارشه‌ممه، له وته‌یه‌كدا له پێشانگای ئایتێکس 2026، رایگه‌یاندوه كه كاركردنی كۆمپانیای كۆڕه‌ك تیلیكۆم به‌نده بە دو مەرجەوە، یەکەمیان، هێنانی ئه‌ستۆپاكییه لە وەزارەتی دارایی فیدراڵییه‌وه، دوەمیشیان پێدانی بڕی 500 ملیار دیناری عێراقییه به دەستەکە وەک گوژمه‌ی كه نزیكه‌ی یه‌ك له‌سه‌ر چواری کۆی شایستە داراییەکانی سه‌ریه‌تی و وه‌كو نیشاندانی نیازی پاکیشە، بەمەرجێک شایستە داراییەکانی دیکە لە چوارچێوەی گرێبەستێکی نوێی یه‌كلاكردنه‌وه‌دا ڕێکبخرێن.
ئه‌بو كه‌له‌ل داواشی لە حکومەتی هەرێمی کوردستان و وەزارەتی گواستنەوە و گەیاندنی هەرێم کرد کە بەشداربن لە چارەسەرکردنی ئەم كێشه‌یه‌داو جەختیشی کردەوە کە دۆسیەی کۆڕەک تیلیكۆم بە تەواوی دۆسیەیەکی تەکنیکی و داراییە و سیاسی نییە، هەروەها هۆشداریشی دایه ئەو کۆمپانیایانەی پەیوەندییەکان کە لە هەرێم بێ مۆڵەت کاردەکەن کە پێویستە دەستپێشخەری بکەن بۆ ڕێکخستنی ڕەوشی یاسایی خۆیان پێش کەڵەکەبونی کێشەکان و تەشەنەسەندنی لێكه‌وته‌كانیان.