کۆنسێرتێکی مۆسیقیی ئۆنلاین لە ئێران بووەتە دۆسیەیەکی یاسایی، ئەمەش دوای ئەوەی دادگایەکی ئەو وڵاتە سزای ٧٤ قامچی بۆ گۆرانیبێژ (پەرەستوو ئەحمەدی) پەسەند کرد، لەسەر بنەمای ئەنجامدانی نمایشەکەی بەبێ حیجاب (باڵاپۆشی).
ئاوێنە: بەگوێرەی ڕاپۆرتێکی ڕۆژنامەی "گاردێان"ی بەریتانی، ئەم سزایە کاردانەوەی فراوانی ناوەندەکانی مافی مرۆڤی بەدوای خۆیدا هێناوە، بەتایبەتی کە کۆنسێرتەکە لە ساڵی ٢٠٢٤دا بەڕێوەچووە و ملیۆنان بینەری هەبووە. دۆسیەکە تەنها گۆرانیبێژەکەی نەگرتووەتەوە، بەڵکو ٨ کەس لە ئەندامانی تیمی بەرهەمهێنان کە ژەنیارانیش لەخۆدەگرن، ڕووبەڕووی سزای یاسایی بوونەتەوە.
بڕیارەکە لەلایەن دادگایەکی شاری قومی ئێرانەوە دەرچووە، کە کۆنسێرتەکەی بە پێچەوانەی "نەریتە یاسایی و کولتوورییەکان"ی وڵاتەکە داناوە و نمایشەکەی بە "بێئابڕووانە و نەشیاو" وەسف کردووە. هەفتەی ڕابردوو بڕیاری پەسەندکردنی سزاکە ڕاگەیەندرا و پێشبینی دەکرێت لە سێ مانگی داهاتوودا سزای قامچیدانەکە جێبەجێ بکرێت.
لەم بارەیەوە ڕۆیا بۆرومەند، هاودامەزرێنەری سەنتەری عەبدولڕەحمان بۆرومەند بۆ مافەکانی مرۆڤ، ئاماژەی بەوە کردووە کە هۆکاری سزادانەکە تەنها دەرکەوتنی پەرەستوو ئەحمەدی نییە بەبێ حیجاب، بەڵکو پەیوەندی بە وتنەوەی گۆرانییە فۆلکلۆرییە کۆنەکانی سەردەمی پێش شۆڕشی ئێرانیشەوە هەیە.
لە لایەکی دیکەوە، موعین خەزائیلی، پارێزەری مافی مرۆڤ لە ناوەندی "دادبان" تایبەت بە ڕاوێژکاریی یاسایی بۆ چالاکوانانی ئێرانی، سزاکەی بە "دژە مرۆڤایەتی" ناوبردووە. ناوبراو پێی وایە بەپێی ڕێککەوتننامەی نەتەوە یەکگرتووەکان بۆ نەهێشتنی ئەشکەنجە، سزای قامچیدان جۆرێکە لە ئەشکەنجەدان. هاوکات سکایلەر تۆمسۆن، جێگری بەڕێوەبەری ڕێکخراوی "چالاکوانانی مافی مرۆڤ لە ئێران"، داوای هەڵوەشاندنەوەی دەستبەجێی ئەو سزایانەی کردووە.
لە پێشهاتێکی پەیوەندیداردا، گۆرانیبێژ (هیوا سەیفیزادە) ڕایگەیاندووە کە مانگی ڕابردوو بەهۆی ئەنجامدانی نمایشێکی هونەرییەوە، سزای ٤ ساڵ زیندانیکردنی بەسەردا سەپێنراوە.
سەپاندنی ئەم سزایانە لە کاتێکدایە کە سەرەڕای لێپرسینەوە یاساییەکان و ئەو کۆتوبەندانەی خراونەتە سەریان، هێشتا بەشێک لە ژنانی ئێرانی بەردەوامن لە دەرکەوتن لە شوێنە گشتییەکاندا بەبێ پۆشینی حیجاب.