بریكاری پێشووی وەزارەتی دارایی عێراق هۆشداریی دەدات لەوەی ئەگەر پرۆژەیاسای بودجەی 2027، بەو شێوەیەی ئێستا لە پەرلەمان پەسەند بكرێت، ئەوا بۆ هەرێمی كوردستان "كارەساتبار" دەبێت.

ئاوێنە: د. فازڵ نەبی، بریكاری پێشووتری وەزارەتی دارایی عێراق بە میدیای پارتی وت "جیا لەوەی پشكی هەرێمی كوردستان لە بودجە لە 14.14% بۆ 12.67 كەم كراوەتەوە، هاوكات مووچەی كوردستان لە خەرجیی فیعلی دەرنەهێنراوە، هەروەها چەندین بڕگە لە خەرجیی سیادی زیاد كراون كەلە بنەڕەتدا خەرجیی سیادی نین و، ئامانج لێی كەمكردنەوە و لێبڕینە لە پشكی هەرێمی كوردستان.

نەبی وتیشی "بەم هەڵومەرجەی ئێستا؛ لە كۆی 217 تریلیۆن دیناری بوودجەی خەمڵێندراوی عێراق، تەنها 13 تریلیۆن دینار بۆ هەرێمی كوردستان دەنێردرێت، ناردنی ئەو بڕە پارەیەش بە چەند كۆت و بەندێك بەستراونەتەوە، ئەوانیش ڕادەستكردنی 400 هەزار بەرمیل نەوتی ڕۆژانە و گەڕاندنەوەی هەموو داهاتە گومرگی و باجەكانە بۆ بەغدا، ئەگەریش هەرێمی كوردستان پابەند نەبێت لە بەشەكەی دەبڕدرێت".

بریكاری پێشووتری وەزارەتی دارایی عێراق ئاماژە بەوەشکرد، کە پێویستە سەركردایەتیی سیاسیی كوردستان لەسەر ئەو مەترسییانەی نێو پرۆژەیاسای بودجە بێنە دەنگ و گوشار لە دەسەڵاتدارانی بەغدا بكەن بۆ چارەسەركردنیان.