مارکۆ ڕوبیۆ، وەزیری دەرەوەی ویلایەتە یەکگرتووەکانی ئەمریکا، ڕایگەیاند کە کۆماری ئیسلامی ئێران لە هەوڵی ئەوەدا بووە "قەڵغانێکی نەریتی" پێکبهێنێت کە لە دەیان هەزار مووشەک و فڕۆکەی بێفڕۆکەوان پێکهاتووە. بە وتەی ڕوبیۆ، ئامانجی تاران لەو هەنگاوە گەیشتن بووە بە قۆناغێک کە تێیدا بتوانێت بە فەرمی دەستپێکردنی پرۆسەی دروستکردنی چەکی ئەتۆمی ڕابگەیەنێت، بەبێ ئەوەی هیچ لایەنێکی دیکە توانای ڕێگریکردنی هەبێت.
ئاوێنە: لە لێدوانەکەیدا کە ماڵپەڕی "برایتبارت"ـی ئەمریکی گواستوویەتیەوە، وەزیری دەرەوەی ئەمریکا ئاماژەی بەوە کردووە کە ئێران لە ئێستادا هێزی ئاسمانی یان هێزی دەریایی نەماوە، هەروەها بەشێکی زۆری سیستمە بەرگرییە ئاسمانییەکانیشی لەدەستداوە. ئەو جەختی لەوە کردەوە کە بەهۆی ئەو پاشەکشە سەربازییەوە، ڕووبەرێکی بەرفراوان لە خاکی ئێران کەوتووەتە دۆخێکی هەستیارەوە و ئەگەر پێویست بکات، لە هێرشەکانی داهاتوودا کراوە دەبێت بەڕووی لێدانەکاندا.
لە بەشێکی دیکەی قسەکانیدا، ڕوبیۆ پێی وایە ئێران بە تەواوی کۆنترۆڵی بەسەر گەرووی هورموزدا لەدەستداوە. بۆ سەلماندنی ئەمەش ڕوونیکردەوە کە تەنها لە ماوەی دە ڕۆژی ڕابردوودا، ڕۆژانە لە نێوان ١٣ بۆ ١٤ ملیۆن بەرمیل نەوت بە سەلامەتی لەو گەرووەوە بەرەو بازاڕەکانی جیهان تێپەڕیوە، لە کاتێکدا ئێران تاکە وڵاتە لە جیهاندا کە تەنانەت ناتوانێت یەک بەرمیل نەوتی خۆی لەو گەرووەوە تێپەڕێنێت.
لە کۆتاییدا، مارکۆ ڕوبیۆ ڕایگەیاند کە ویلایەتە یەکگرتووەکانی ئەمریکا لە ئێستادا لە گەرووی هورموزدا لە دۆخی ئامادەباشی و بەرگرییدایە. هاوکات ئەوەشی خستەڕوو کە ئەم جێگیربوونەی ئەمریکا هاوتەریبە لەگەڵ ئەو هەنگاوانەی ناوی برد بە "کاری نایاب"، کە مەبەست لێی ئیفلیجکردنی ئابووریی ئێران و بڕینی سەرچاوە داراییەکانیەتی.