لەدادگا چیم بینی؟
  2020-08-11       1192       
ئا: بڕیار نامیق

ئەمڕۆ سێشەممە (11/8/2020) وەک هەموجارێک بۆ روماڵی‌ دادگایکردنیكەیسی سێوان قادرو منداڵەكانی چومە بەردەم ئەو هۆڵەی‌ کە هەموجارێک پڕۆسەی دادگایی کردنەکەی تێدا بەڕێوەدەچو، دواجار روخستەم لەپاسەوانەکان وەرگرت‌و چومە ناوهۆڵی‌ دادگا.

دۆسیەی سێوان قادر دوایەمن دۆسیەبو لەو رۆژەدا، بۆیە چەند دۆسیەیەکی‌ جۆراو جۆر وەک ساختەکردنی پارەو دەستبڕین و مادەی‌ هۆشبەر  بەڕێوەچوبو. 

سەعات (11 و 30) خولەک دۆسیەی‌ سێوان قادر وەک داوایەمین دانیشتن کرایەوەو دادوەر بەدەنگی‌ بەرز وتی‌ کێ دەیەوێت بێتە دانیشتنەکە دەرگا کراوەیەو رێگە لەکەس مەگرن.

هۆڵەکە دابەشبو بەسەر دوبەرەدا، کەسوکاری‌ (دیار)ی‌ هاوسەری‌ سێوان لەبەشی‌ راستی‌ هۆڵەکەو کەسوکاری‌ سێوانیش لەبەشی‌ چەپی‌ هۆڵکە دانیشتبون، سەرەتا تۆ مەتباریسەرەكی بانگی ناو قەفەزی تاوانکراو هەر کە هات داوای‌ کورسیەکی‌ کرد بۆ دانیشتن، دادوەر داواکەی‌ جێبەجێکردو پاشان لەرێگەی‌ پارێزەرەكەیەوە، داوای‌ شاهیدێکی نوێ کرا لەسەر بەڵگەیەکی‌ نوێ بۆ ئەو قسیەیەی‌ دیاری‌ پێ تۆمەتبار کرا کە بەدەنگ و بەر لەچەند رۆژێک لەمردنی‌ سێوان، لەبەردەم چەند کەسێکدا چیرۆکی‌ سوتانی‌ خۆی‌ و منداڵکانی‌ دەداتە پاڵ هاوسەرەکەی‌. 

ئەمە بوە هۆی‌ ئەوەی‌ کە ئەو شاهیدە نوێیە لەبەردەم دادگا و دادەوەردا سوێند بخوات و دەستی‌ خستە سەر قورئان کە چی راستە ئەوە بڵێت، پاشان ئەو شاهیدە شتێکی‌ نوێی درکاند ئەوەیش ئەوەبو کە سێوان کاتێک هێندراوتە نەخۆشخانەی‌ سوتاوی‌ کەسوکاری‌ خۆی‌ لەگەڵ نەبوە، هەم سێوان خۆی‌ و هەم ئەو کەسانەی لەگەڵی بون وتبویان لەداخی‌ هاوسەرەكەی وای‌ لەخۆی‌ کردوە نەک ئەو وای‌ لێکردبێت، وەک ئەوە شاهیدە وتی‌:"تەنانەت ژنێک لەگەڵیدابو وتویەتی‌ خوا بیانگرێت، دیار هەر لەوێ نەبوە”، بەڵام قسەی‌ ئەم شاهیدە لەدوا چرکەکانی‌ کۆتایی دادگاییەکەدا بۆچونی‌ دادگای‌ نەگۆڕی‌ و وەک دادوەر وتی:"دو ساڵە ئەم دۆسیەیە هەبوە تۆ بۆ نەهاتیت؟ وەڵامی‌ شاهیدی‌ نوێ بۆدادگا باوەڕپێکەر نەبو كە وتی‌: لەبەر ئەوەی‌ دەوامم هەبوە نەهاتوم!

لەدواهەمین دادگایی هاوسەری‌ سێوان چیم بینی‌ 
هێزێکی‌ زۆ هاتبونە ناو دادگا بۆ رێگریکردن لەهەر روداو و پێشهاتێک کە بۆ دڵ گەرمی‌ نێوان کەسوکاری‌ هەردولادا روبدات، دادوەری‌ دۆسیەکە لەو دانیشتنە، دەیویست بەردەوام کۆنتڕۆڵی‌ خۆی‌ بکات بۆئەوەی‌ بتوانێت بڕیارێکی‌ دادپەروەرانە بدات، بۆیە داوای‌ لەبریکاری‌ سەرەکی‌ هاوسەری سێوان کرد دوایەمین لائیحەی یاسایی خۆی‌ لەسەر دۆسیەکەی‌ ئاڕاستەی‌ دادگا بکات. 

بۆماوەی‌ دو سەعات و (35) خولەک لەدوتوێی (48) لاپەڕەی‌ ئەی فۆڕدا بریکاری‌ سەرەکی‌ هاوسەری‌ سێوان قادر تیانوسی بەرگری‌ لەتۆمەتباری‌ خوێدەوە.

دیاری‌ هاوسەری‌ سێوان بەچی‌ تۆمەتبارکرابو؟
دادگا ئەوگرتە ڤیدیۆیەی کردە سەنگی‌ مەحەک کاتێک سێوان لە نەخۆشخانە چەند رۆژێک بەر لەگیانلەدەستدانی‌ چیرۆکی‌ سوتانەکەی‌ دەخاتە ئەستۆی‌ هاوسەرەكەی و باس لە شێوازی‌ سوتاندنی‌ خۆی‌ و منداڵەکانی‌ دەکات.

لەناو تێنوسەکەشدا بریکاری‌ سەرەکی‌ بەبەڵگەی‌ ڤیدیۆ و بەدەنگ و شاهیدحاڵ ئەو قسانەی‌ سێوانی‌ رەتکردەوەو وتی‌: سێوان دو جۆر قسەی لە نەخۆخشخانە هەیە بەر لەمردنی‌. 

1-لەگەڵ گەشتنی‌ رۆژی‌ روداوەکە بۆ نەخۆشخانەی‌ سوتاوی‌ سلێمانی‌ دەڵێت: لەداخی‌ دیار وام لەخۆم و منداڵەکان کرد. 

2-بڕۆ فریای‌ منداڵەکان بکەون خوا دەکات ئەوان سەلامەت دەبن من هیچم ناوێت. 

3-سێوان لە نەخۆشخانەی‌ چەمچەماڵ لەبەردەم پۆلیسدا وتویەتی‌ سکڵام لەکەس نیە، وتویانە لەمێردەکەشت، سێوان وتویەتی‌: بەڵێ.

هەر لەو تێنوسەی‌ بریکاری‌ سەرەکی‌ بەڵگەیەکی‌ تر خرایەڕو کە داوا لەدادگا کرا ئەو شاهیدو بەڵگە دەنگیانە بەهەند وەرگیرێن کە دوای‌ گەشتنی‌ کەسوکاری‌ سێوان بۆ نەخۆشخانەی‌ سوتاوی‌ سلێمانی‌ سێوان قسەکانی‌ دەگۆڕێت. بەڵام لەسەر بنەمای هەمان قسەی دادوەر بۆ شایەتحاڵەكە، وتە نوێیەكان لەلایەن دادگاوە بەهەندی‌ وەرنەگیرا.

لەو دو سەعاتەی کە ئەو تێنوسە دەخوێندرایەوە بەپشت بەستن بەبەڵگەکانی‌ تاوان، سەرجەم ئەو تۆمەتانەی‌ رەتکردەوە، هەر بۆ نمونە کێلون و زمانەی‌ دەرگای‌ یەکێک لە دەرگاکان کە رەنگی‌ هەر بە (ستیلی‌) مابۆوە، ئەمە وەک پارێزەرەکەی بەدادوەری‌ وت: بەڕێز دادوەر ئەگەر دەرگاکە دابخرایە وەک بەڵگەی‌ تاوان دەڵێت: دەبو بەدوکەڵ رەش بێت، وە یەکێکی‌ تر لەدەرگاکان کە زمانەی‌ دەرگاکەی هەر تێدانەبوە. 

ئەمانە بەشێکی‌ زۆربون لەو بەڵگە لەدژ یەکانەی‌ کە (16) دانیشتنە لەدادگای‌ سلێمانی دژ بەیەک دەوترێت، بەڵام وەک پارێزەرکەی‌ بەدادوەری‌ وت: ئەم دۆسیەیە شەقامی‌ جوڵاند، بۆیە رەنگە کاریگەری‌ لەسەر دادگا هەبێت‌و بڕیارێک لەبەژەوەندی‌ هاوسەرەکەی‌ دەربکات. 

دوا دیمەنەکانی‌ دادگایەکەی‌ چی بون؟ 
دەرگای هۆڵی‌ دادگاییەکە دوای‌ دە خولەک لەداخستن کرایەوە، کاتێک چوینە ژوەرەوە سەرەی‌ دۆسیەکەی‌ هاوسەری سێوان هات، دادوەر داوای‌ دوا وتەی‌ کرد، ئەویش بەدەنگی‌ بەرزو بەگریانەوە وتی‌: بەڕێز جەنابی دادوەر کێ دەستی‌ دەچێتە سەرسوتانی‌ منداڵی‌ خۆی‌ کێ هەیە ژنی‌ خۆی‌ کە خۆشی بوێت بیسوتێنێت، جەنابی حاکم بەڵگەیەک نیشانی‌ من بدە کە من بتوانم لەماوەی‌ (27) چرکەدا ئەو تاوانە گەورەیە بکەم، ئامادەم لێرەدا لەسێدارەم بدەن، من دو ساڵە نەخەوم هەیە نەخواردن، بیری‌ منداڵەکانم دەکەم، بیری‌ هەمو شتێک، من ژیانم لەدەستدا جەنابی‌ حاکم تکایە بەزەییەک
لەبەرامبەردا دادوەر ئاماژەی بەوە كرد كە زۆر بەڵگە هەبون کە ئەوی پێ تۆمەتبارکراو سەلمێندرا، ”بۆیە تۆمان بەماددەی‌ (406) تۆمەتبارکرد.”

ئەوەی‌ یاسایی نەبوبێت نەیدەزانی‌ چیەو لەچەپی‌ هۆڵەکە دەگریان‌و دوعای لەسێدارەدانیان دەکرد، لای راستی‌ هۆڵەکە بەپێچەوانەوە داوای‌ سزای‌ سوکیان دەکرد. بەڵام کاتێک دادوەر وتی‌: بڕیارماندا تۆ لەسێدارە بدرێیت، لایەکی دادگا بوە شایی‌و لایەکی دیکەش بو بەشیوەن‌و گریان، لەنێوان ئەم دو دیمەندا ئەوەی‌ کۆتایهات ژیانی‌ هەتاهەتای‌ی سێوان‌و منداڵەکانی بو، ئەمڕۆش ژیانی‌ دیارو ئەو خزمایەتیەی نێوان ئەو دو بنەماڵەیە، تەواو پێچەوانە بوەوە.
زۆرترین بینراو
© 2020 Awene Online, Inc. All Rights Reserved.
×