2021-04-05 396
راگەیاندنی هاتوچۆی گەرمیان بڵاویکردەوە، ئەمڕۆ دوشەممە لە روداوێکی هاتوچۆدا دوکەس مردن و چوار کەسیش برینداربون.
ئاوێنە: راگەیاندنی هاتوچۆی گەرمیان لەراگەیەندراوێکدا باسی لەوەکردوە، بەیانی ئەمڕۆ دوشەممە لەملەی گوندی تورانی سەربەناحیەی ڕزگاری، بەهۆی پێكدادانی دو ئۆتۆمبێلی جۆری تۆیۆتا پیکاب هایلۆکس و نیسان پیکاب دو کەس مردون و چوار کەسیش برینداربون.
ئاماژەی بەوەشکردوە، دوای گەیاندنی بریندارەکان بە نەخۆشخانەی فریاکەوتنی شەهید هەژار لە کەلار بەهۆی سەختی برینەکەیانەوە دو لەبریندارەکان مردون، کە هەردوکیان ژنن و یەکێکیتر لە بریندارەکان کە کچێکی 12 ساڵانە، بەهۆی سەختی برینەکەیەوە ڕەوانەی نەخۆشخانەکانی سلێمانی کرا.
راگەیاندنی هاتوچۆی گەرمیان ئەوەشی خستەڕو، لەئێستادا تیمەکانی بەڕێوەبەرایەتی هاتوچۆی گەرمیان بەمەبەستی زانینی هۆکاری ڕوداوەکە لێکۆڵینەوەیان دەستپێکردوە.