2021-05-11 360
ئەندامێكی لیژنەی ئاسایش و بەرگری لە پەرلەمانی عێراق باس لە بوونی مەترسی روودانی پێشێلكاریی ئەمنی دەكات كە بەڕێوەچوونی پرۆسەی هەڵبژاردنی داهاتوو پەك بخات كە وابڕیارە لە دەی تشرینی یەكەمی داهاتوو سازبكرێت.
گاتع رەكابی ئەندامی لیژنەی ئاسایش و بەرگری لە سەرەتای ئایاری 2021 لە لێدوانێكی رۆژنامەوانیدا رایگەیاند رەوشی ئەمنی نالەبار بووە لە سایەی بڵاوبوونەوەی چەكی لەیاسا دەرچوو، و چالاكی و جموجۆڵی رێكخراوی داعش لە ژمارەیەك ناوچە لە عیراق، ئەمەش بووەتە مایەی نیگەرانی لەڕووی دابینكردنی ئاسایش بۆ هەڵبژاردن و سەرخستنی پرۆسەكە.
بە وتەی رەكابی لیژنەی ئاسایش و بەرگری بەردەوامە لە سازدانی كۆبوونەوە و چاوپێكەوتنەكانی لەگەڵ فەرماندە ئەمنییەكان لە هەردوو وەزەتی ناوخۆ و بەرگری بۆ تاوتوێكردنی ژینگەیەكی لەبار بۆ هەڵبژاردن، چونكە عیراقییەكان پێشتر رووبەڕووی رەوشی ئەمنی زۆر خراپ بوونەوە و ئەمەش رێگر نەبوو لە بەشداریكردنیان لە هەڵبژاردن.
ئەو ئەندامەی لیژنەی ئاسایش و بەرگری لە ئەنجومەنی نوێنەران دەڵێت عیراق هێزێكی ئەمنی گەورەی هەیە لە سوپا و پولیس و دەزگاكانی دژە تیرۆر و ئاسایشی نیشتمانی، گەر رێكاریی پێویست بگیرێتەبەر و هەوڵی هەواڵگری بخرێتەگەڕ، ئەوا هیچ پێشیلكارییەكانی ئەمنی وەك ئەوانەی ئێستا روودەدەن، بەدی ناكەین».
سەبارەت بە راگەیاندنەكەی مستەفا كازمی سەرۆك وەزیرا، لەبارەی پێكهێنانی لیژنەیەكی تایبەت لە هێزە ئەمنییەكان بۆ دابینكردنی ئاسایش بۆ هەڵبژاردن، ڕەكابی وتی لە ساڵی 2003وە هەزاران لیژنە بۆ پرسە ئەمنی و ئابورییەكان پێكهێنران، بەڵام هیچ ئاكامێكیان نەبوو لە واقعیدا.