2021-06-13 469
سه‌رۆكی لیژنه‌ی ناوخۆی په‌رله‌مانی كوردستان، ئاشكرایكرد كه به یاوه‌ری سه‌رۆكی په‌رله‌مانی كوردستان، سه‌ردانی ده‌ستگیركراوانی بادینانیان كردووه و كۆمه‌ڵێك پێویستیشیان بۆ ده‌سته‌به‌ركردوون.
شاخه‌وان ره‌وف به‌گ، سه‌رۆكی لیژنه‌ی ناوخۆی په‌رله‌مانی كوردستان، به میدیاكانی بزووتنه‌وه‌ی گۆڕانی راگه‌یاندووه: "رۆژی پێنجشەممەی رابردوو به یاوه‌ری سه‌رۆكی په‌رله‌مانی كوردستان و چه‌ند لیژنه‌یه‌كی په‌یوه‌ندیداری په‌رله‌مان سەردانی دەستگیراوەکانی بادینانمان کرد لە ده‌زگای ئاسایش و بەلامانەوە گرنگ بوو کە سەردانیان بکەین و چاودێری و متابەعەی وردی دۆسییەکەیان بکەین، دیارە هاوكات ئێمە وەک فراکسیۆنی گۆڕانیش لە رابردووشدا هەر چاودێری وردی کەیسەکەی ئەوانمان کردووە سەردانەکەشمان سەردانێکی زۆر باشبوو".
وتیشی: "توانیمان هەر شەش حەوتیان بە جیا ببینین و بۆ هەریەکەیان نیو کاتژمێرێک لەگەڵیان دانیشتین هەواڵی دۆسێکەیان و تەندروستی و جێگەو رێگە و هەموو شتێکیمان پرسیووە، كه خۆشبەختانە هەم تەندروستیان باشە هەم جێگە و رێگەشیان باشبوو وە بەلامانەوە گرنگ بوو کە لەگەڵ ئیدارەی سجنەکەش قسەبکەین خۆشبەختانە ئیدارەی سجنەکە ئەوانیش بەدەم داواکارییەکانمانه‌وه هاتن و وە هاوکاری تەواوی لیژینەکەی ئێمەیان کردووە ئەوەی کە شتی پێویست بوو لەگەڵیان دانیشتین و باسمان کرد ئەوەشی کە پەیوەندی هەیە بە دۆسییەکەیان دیارە ئێستا لە قۆناغی تەعن و تەمیزدایه، وە ئومێد ئەکەین لە داهاتوودا ئەنجامێکی باشی هەبێت".
سه‌باره‌ت به دیداری ده‌ستگیركراوان و كه‌سوكاریان، شاخه‌وان ره‌وف به‌گ وتی: "ئێمە توانیمان لەسەردانەکەماندا مەوعیدی بینینی کەسوکاریان و مواجەیه‌کیان بۆ تەرتیب بکەین بۆ ئەمڕۆ یه‌كشه‌ممه 13ی حوزه‌یرانی 2021، جگه له‌وه، توانیومانە هەواڵی تەندروستیان بپرسین و دکتۆر بێت چێکی عامیان بکات، کە تەندروستیان زۆر باشبوو، تا رادەیەک بینینەکە هەم لەبارەی دەروونیەوە بۆ ئەوان زۆر باشبوو هەم ئێمەش وەک پەرلەمانتارەکان بەلامانەوە گرنگ بوو کە چاودێری دۆسییەکەیان بکەین".