میلیشیا چەكدارە ئیخوانییەكانی لیبیا بەرەو تونس دەستیان بەجوڵەكرد
  2021-07-26       1050       

میلیشیا چەكدارە ئیخوانییەكانی خۆرئاوای لیبیا باری نائاساییان راگەیاند لەنێو سەربازگەكانیاندا و سەرجەم چەكدارەكانیان بانگكردەوە بە فەرمانی فەرماندارەكانیان دوای كودێتاكەی شەوی رابردووی تونس دژی ئیخوان.

ئاوێنه‌: ئەم جموجۆڵە دوای راگەیاندراوێكی خالید مشری سەرۆكی ئەنجومەنی باڵای دەوڵەتی لیبیا دێت كە سەر بە ئیخوانە لە لیبیا و بڕیارەكانی سەرۆكی تونسی رەتكردەوە و بە كودێتای وەسفكرد.

سەرچاوەیەكی لیبیایی بۆ كەناڵی سكاینیوز رایگەیاند كۆبوونەوەی سەركردەكانی ئیخوان لە لیبیا هەیە دوای بڕیارەكانی سەرۆكی تونس، لەگەڵ سەركردەكانی ئیخوان لە تونس قسەیانكردووە، دوای راگەیاندنی باری نائاسایی میلیشیا چەكدارەكانیان.

سەرچاوەكان دەڵێن 3 سەربازگە هەڵكەوتوو لە دووری 218 كیلۆمیتری سنووری تونس باری نائاساییان راگەیاندووە، جموجۆڵی میلیشیاكانیش بینراوە بەرەو سنوورەكانی تونس.

خالید مشری دەڵێت: ئێمە بڕیارەكانی سەرۆكایەتی تونس رەتدەكەینەوە، ئەوە كودێتایە بەسەر كیانێكی هەڵبژێردراودا و ئاستەنگیی رێگای دێموكراسییە.

لە بەرامبەردا سوپای نیشتمانیی لیبیا پیرۆزبایی لە گەلی تونس كرد بەبۆنەی بڕیارەكانی سەرۆكی تونس و بە “ڕاپەڕینی گەل بەسەر ئیخوان”دا پێناسەی كرد.

قەیس سەعید سەرۆكی تونس بڕیاری هەڵوەشاندنەوەی پەرلەمانی تونس و سەندنەوەی پارێزبەندیی پەرلەمانتاران و دوورخستنەوەی هیشام مەشیشی سەرۆك وەزیرانی دا.

ئەم بڕیارەی سەرۆكی تونس بە كودێتا دێتە هەژماركردن لە دژی رێكخراوی ئیخوان موسلیمین كە هەژموونی بەسەر پەرلەمان و حكومەتی تونسدا كردووە لە دوای شۆڕشەكانی بەهاری عەرەبی لە 2011وە.

 
زۆرترین بینراو
© 2021 Awene Online, Inc. All Rights Reserved.
×