لەكاتی وێنەگرتنی فیلمێكی هۆڵیوددا، وێنەگرەكە كوژراو دەرهێنەری فیلمەكەش برینداربو
  2021-10-22       1073       

ئەلیك بالدوین، ئەكتەری هۆڵیود، لەكاتی رۆڵ بینینی لەمیانی وێنەگرتنی دیمەنی فیلمێكدا لە ویلایەتی نیومەكسیكۆ، وەك بەشێك لە دیمەنەكە تەقە دەكات، بەڵام ئەو چەكەی بۆ دیمەنەكە بەكارهاتوە گوللـەی راستەقینەی تێدابوەو بەهۆیەوە بەڕێوەبەری وێنەگرتن كوژراوەو دەرهێنەری فیلمەكەش برینداربوە. 

ئاوێنە: پۆلیسی ویلایەتی نیومەكسیكۆ، پشتڕاستی كردۆتەوە كە لەكاتی وێنەگرتنی ئەو فیلمەدا لە شوێنی وێنەگرتنەكە ژنێك و پیاوێك برینداربون و دوای گواستنەوەیان بۆ نەخۆشخانە ژنەكە گیانی لە دەستداوە.

ئەو ژنەی گیانی لە دەستداوە، هالینا هاچێنز(42 ساڵ) و بەڕێوەبەری وێنەگرتنی فیلمەكە بوە. پیاوە بریندارەكەش جۆیل سوزا(48 ساڵ)، دەرهێنەری فیلمەكەیە.

دەرهێنەری فیلمەكە ئێستا لە نەخۆشخانە لەژێر چاودێری چڕدایە.

وتەبێژی ئەلیك بالدوین بە ئەسۆشیەتید پرێسی وتوە، روداوەكە بەهۆی تەقەكردن بوە بە چەكێكی تایبەت بە فیلم كە دەبو فیشەكی تێدا نەبێت.

پۆلیسی دەستی بە لێكۆڵینەوە لە روداوەكەو وەرگرتنی وتەی شایەتحاڵەكان كردوە بەڵام تا ئێستا هیچ كەسێك تۆمەتبار نەكراوە.

زۆرترین بینراو
© 2021 Awene Online, Inc. All Rights Reserved.
×