سەرۆکی دەزگای هەواڵگری ئیسرائیلی ڕایگەیاند، سەرکەوتنی دانوستانە ناوەکییەکانی نێوان ئێران‌و وڵاتانی زلهێز لەڤییەننا لەبارەی پڕۆگرامە ناوەکییەکەی تاران بۆ تەلئەبیب لەوەباشترە دانوستانەکان شکستبهێنن‌و هیچ جۆرە ڕێککەوتنێک نەکرێت.
بەگوێرەی پێگەی هەواڵی "والا"ی عیبری، جەنەراڵ ئەلون حلێوە سەرۆکی دەزگای هەواڵگریی ئیسرائیل لەکاتی دانیشتنێکی ئەنجومەنی ئاسایشی بچوکراوەی ئیسرائیل (کابینێت) ڕایگەیاندوە، گەڕانەوەی تاران بۆ پابەندییەکانی بەگوێرەی بەرنامەی ناوەکیی کۆتوبەندەکانی سەر بەرنامە ناوەکییەکەی ئێران زیاتر دەکات لەوەی هیچ جۆرە ڕێککەوتننامەیەک لەئارادا نەبێت.
پێگە عیبرییەکە لەسەر زاری دوو وەزیری ئیسرائیلی کە ئامادەی دانیشتنەکەی ئەنجومەنی ئاسایشی بچوککراوەی ئیسرائیل بون گواستوویەتییەوە کە حلێوە پێیوابوە، گەڕانەوەی تاران بۆ ڕێککەوتننامەی ناوەکیی کاتێکی زۆر بۆ ئیسرائیل دەگێڕێتەوە تاوەکو ئامادەکارییەکانی بۆ ئەنجامدانی سیناریۆکانی دژ بەتاران تەواو بکات.
بەوتەی ئەو دوو وەزیرە، گەیشتن بەڕێککەوتن بۆ زیندوکردنەوەی ڕێککەوتننامەی ناوەکیی دەبێتە هۆی ئەوەی بەئاشکراو بەهۆی پەلاماردانی ئێرانەوە گرژکردنی پەیوەندییەکان لەگەڵ ئیدارەی بایدن دروستبکەنەوە، وەک ئەوەی یائیر لابیدی وەزیری دەرەوەی ئیسرائیل لەکۆبونەوەکەی کابینێتدا وتویەتی:"ئەمریکا گرنگترین هاوپەیمانی ستراتیژیی ئیسرائیلەو نابێت پەیوەندییەکانمان لەگەڵیاندا تێکبدەین".