"40%ی خاكى دهۆك له‌لایه‌ن توركیاوه‌ داگیركراوه‌"
  2022-07-21       592       

ئا: ئاوێنە

 

په‌رله‌مانتارێكى كورد له‌به‌غدا زانیارییه‌كى گرنگ له‌باره‌ى بوونى توركیا له‌ناو خاكى هه‌رێم ئاشكراده‌كات‌و ڕایده‌گه‌یه‌نێت، "40%ى خاكى پارێزگاى دهۆك له‌لایه‌ن توركیاوه‌ كۆنترۆڵكراوه‌"، ده‌شڵێت:"له‌ئێستادا زیاتر له‌30 كیلۆمه‌تر توركیا هاتۆته‌ ناو خاكى هه‌رێمى كوردستانه‌وه‌و حكومه‌تى هه‌رێمیش پێشڕه‌وى بۆ توركیا ده‌كات".



لەبەردەم نوسینگەی پەرلەمانی عێراق له‌شارى سلێمانى دژی هێرشەکانی تورکیا خۆپیشاندان ئه‌نجامدراو له‌كۆنگره‌یه‌كى ڕۆژنامه‌وانیدا، سۆران عومه‌ر ئه‌ندامى په‌رله‌مان ئاشكرایكرد، "له‌40% خاكى دهۆك به‌ئه‌منى‌و سه‌ربازى له‌لایه‌ن توركیاوه‌ داگیركراوه‌و 30 باره‌گاى هه‌واڵگریى‌و سه‌ربازیى توركیا له‌ناو خاكى هه‌رێم بونیان هه‌یه‌".

باسى له‌وه‌ش كرد "به‌گوێره‌ى ڕێكه‌وتنێك له‌نێوان عێراق‌و توركیادا، سوپاى توركیا ته‌نها بۆى هه‌یه‌ 5 كیلۆمه‌تر بێته‌ ناو خاكى عێراق، به‌ڵام توركیا ئه‌و ڕێكه‌وتنه‌ى پێشێلكردووه‌و زیاتر له‌‌30 كیلۆمه‌تر هاتوه‌ته‌ ناو هه‌رێمه‌وه‌، به‌و هۆیه‌شه‌وه‌ سه‌دان گوندو ڕه‌زو باخى هاوڵاتیان چۆڵكراون".

ئه‌وه‌شى وت "پێش قه‌واره‌ى هه‌رێمیش په‌كه‌كه‌ له‌و چیایانه‌ى ئێستا بونى هه‌یه‌ هه‌ر بونى هه‌بووه‌و نوێ نییه‌ بونى په‌كه‌كه‌".

له‌باره‌ى هه‌ڵوێسته‌كانى حكومه‌تى هه‌رێمیش له‌باره‌ى وێرانكارییه‌كانى توركیا له‌ناو خاكى هه‌رێم جه‌ختیكرده‌وه‌، "جگه‌ له‌به‌یاننامه‌ى شه‌رمنانه‌ حكومه‌تى هه‌رێم هیچى ترى نه‌كردووه‌".

ئەو وتی "ڕێكه‌وتننامه‌ى 75 ساڵه‌ى عێراق‌و 50 ساڵه‌ى هه‌رێم له‌گه‌ڵ توركیا وایكردووه‌ ڕێگه‌خۆشكه‌ر بێت بۆ په‌لاماره‌كانى توركیا بۆسه‌ر هه‌رێمى كوردستان".

له‌باره‌ى هه‌ڵوێستى عێراقیش له‌به‌رامبه‌ر توركیا، سۆران عومه‌ر وتى "رۆژی شه‌ممه‌ 23ی تەموز كۆبونه‌وه‌ى په‌رله‌مان هه‌یه‌و تائێستا 118 په‌رله‌مانتار واژۆیان كۆكردۆته‌وه‌ بۆ ئاماده‌بوونى سه‌رۆك وه‌زیران بۆ ئه‌وه‌ى ورده‌كارییه‌كانى ڕێكه‌وتن‌و هه‌ڵوێسته‌كان له‌گه‌ڵ توركیا ئاشكرابكرێت".

ئه‌وه‌شى وت:"سه‌رجه‌م داواكاریه‌كان بریتین له‌وه‌ى، هێزى چه‌كدارى توركیا له‌خاكى هه‌رێم بكرێته‌ ده‌ره‌وه‌و حكومه‌تى هه‌رێمیش چیتر نه‌بێته‌ پێشڕه‌و بۆ توركیا، مه‌عقول نییه‌ به‌درۆن له‌ئاغجله‌رو كه‌لار ئۆتۆمبێل بكرێته‌ ئامانج كه‌ چه‌كدارێكى په‌كه‌كه‌ى تێدایه‌".

نه‌یشارده‌وه‌، "مه‌ترسیه‌كى گه‌وره‌ ڕووى له‌عێراق‌و هه‌رێم كردووه‌، واى لێدێت سه‌یاره‌ى خه‌ڵك ده‌ته‌قێندرێته‌وه‌و ده‌ڵێن چه‌كداریی په‌كه‌كه‌ بووه‌، ئه‌وكاتیش كه‌س قسه‌ ناكات".

 

زۆرترین بینراو
© 2022 Awene Online, Inc. All Rights Reserved.
×