راپرسییەك لەسەر دۆخی یەكێتی نیشتیمانی كوردستان
  2022-07-27       411       

ئا: ئاوێنه

 

بەپێی راپرسییەك لەسەر دۆخی یەكێتیی نیشتیمانیی كوردستانل کە ئەنجامەکانی دەست ئاوێنە کەوتوە، 93%ی ئەندامانی یەكێتیی پێیانوایە یەكێتی لەئاست خواستی جەماوەر نییە، لە 86.9% جەماوەری یەكێتیی پێیانوایە ئەم حزبە یەك بڕیار نییە، لە 91.6% ئەندام و كادرانی یەكێتیی دەڵێن مەكتەبی سیاسی و سەركردایەتی رۆڵیان لەبڕیاردانی یەكێتیدا نیەو لە 84.4% ئەندامانی یەكێتیی پێیانوایە حزبەكەیان رۆڵی لەبڕیاردانی هەرێمدا نیە.

 

بەپێی زانیارییەکانی ئاوێنە، ژماره‌یه‌ك كادری پێشكه‌وتووی یه‌كێتیی نیشتیمانی كوردستان له‌شاره‌كانی هه‌ولێرو كه‌ركوك‌و سلێمانی كه‌ به‌شێكیان شاره‌زان له‌بواری راپرسیكردن، راپرسیەكیان كردووە له‌ناو رێكخستنه‌كانی یه‌كێتی نیشتیمانیی كوردستان و لەماوەی 48 كاتژمێر 1687 فۆرم لەلایەن ئەندامانی سەركردایەتی و كادرانی باڵاو لێرسراوی مەڵبەندو كۆمیتەو ئەندامانی یەكێتیی نیشتیمانی پڕكراوەتەوە. ئەنجامەكانیش بەشێوەیەكی ئەلیكترۆنی و بەپێی پرسیارو وەڵامەكان بەبێ‌ دەستوەردان وەرگیراونەتەوە، بێ‌ ئەوەی ناوی ئەو كەسانە بزانرێت كە فۆرمەكانیان پڕكردۆتەوە. پڕكردنەوەی هەر فۆرمێكیش نزیكەی دوو خولەکی خایاندووە.

بەقسەی یەكێك لەنێو ئەو تیمەی راپرسیەكەی كردووە بۆ ئاوێنە، ئەنجامی راپرسیەكەیان بەلاوە زۆر سەیر بووە، چونكە پێشبینی ئەو ژمارانەیان نەكردووە، بەتایبەتیش ئەوەی پەیوەندی بەدۆخی دوای رووداوەكانی 8ی تەمووزەوە هەیە.

سەرچاوەكە رونیكردەوە كە راپرسیەكەیان لەڕێی ئەپلیكەیشنی واتسئاپەوە كردووەو وتی رەنگە لەڕێگەی ئەپی دیكەشەوە بۆ ئەندام كادرانی یەكێتیی رەوانەكرابێت و وەڵامیان دابێتەوە. وتیشی راپرسیەكە بۆ تەنها لەنێو مەكتەبی سیاسی و سەركردایەتی و كادرانی پێشكەوتوو ئەندامانی یەكێتیی لەزاخۆوە تاوەكو خانەقین كراوەو لەماوەیەكی زۆر دیاریكراو و بەبێ‌ ئاگاداركردنەوەی پێشوەختە، تاوەكو دەستوەردان لەدەنگدانی راپرسیەكەدا نەكرێت. روونیشیكردەوە كە ئەوانەی وەڵامی پرسیارەكانی راپرسیەكەیان داوەتەوە، مەرج نییە هەر 14 پرسی راپرسیەكەیان وەڵامدابێتەوە. وتی لەگەڵ نەخشەی چارتەكان ژمارەی ئەوكەسانەی وەڵامی هەر پرسیارێكیان داوەتەوە تۆماركراوە.

ئەو ئەندامەی تیمی راپرسیەكە وتی راپرسیەكە 48 كاتژمێر چاوەڕێی وەڵامیان كردووە. وتیشی سەرەتا پێشبینیمانكرد وەڵامی كەمتر لە هەزار فۆرم وەرگرینەوە، بەڵام ژمارەی فۆرمە گەڕاوەكان لەپێشبینیەكەمان زۆر زیاتربوون و لەماوەی 48 كاتژمێر نزیكەی 1700 فۆرم وەڵامی هاتەوە! وتیشی ئەمە سەرباری هەوڵ و فشاری چەند مەڵبەندو ئۆرگانێك لەسەر ئەندامانی یەكێتیی تاوەكو فۆرمەكە پڕ نەكەنەوە، بۆنمونە لەسلێمانی و سۆران و یەك دوو شوێنی دیاریكراوی كەركوك.

سەرچاوەكە رونیكردەوە كە ئەوان بۆ زانینی دۆخی یەكێتیی و واقعی دوای 8ی تەمووز راپرسیەكەیان كردووە، ئەوەی جێی سەرنج بووە وڵامی چەند پرسیارێك بووە لەكۆی 14 پرسیار كە لەنێو راپرسیەكەدا خستویانەتە روو، توشی سەرسوڕمانی كردوون. لەوانە: دۆخی قوباد تاڵەبانی بۆ سەركردایەتی كردنی یەكێتیی هەروەها تێگەیشتن و هەڵسەنگاندنی كادرو لایەنگرانی یەكێتیی لەبارەی كارەكانی تیمی یەكێتیی لەحكومەت، هاوكات رۆڵی سەركردایەتی یەكێتیی لەدوای 8ی تەمموزو كاریگەری دووركەوتنەوەی لاهور شێخ جەنگی لەناوخۆی یەكێتیی.

بەقسەی ئەو سەرچاوەیە، دۆخی یەكێتیی ئەوەندە خراپە لەئێستادا، پێویستی بەچارەسەرێكی زۆر خێراو كاریگەر هەیە. وتیشی لەداهاتوودا پرۆژەیەكی دیكەمان هەیە بەهەمانشێوە راپرسیە، بەتایبەت بڕیارە گۆڕانكاریی لەمەڵبەندو ئۆرگانەكان بكرێت بەدەر لەپەیڕەوی ناوخۆ، هەروەك سەبارەت بەچارەسەری گرفتەكانی ناوخۆی یەكێتیی و تێگەیشتنی سەركردایەتی و كادران و ئەگەرەكانی چارەسەركردن پرۆژەی راپرسی دیكە دەخەینە روو. تەئكیدیشیكردەوە ئەو كارەیان لەپێناو بەرچاوڕوونی سەركردایەتی و جەماوەری یەكێتییە، كە ئەمە لەهەموو حزبێكی دونیا ئاساییە.

 

ئەنجامی راپرسیەكە بەپێی پرسیارەكان بەمشێوەیەی خوارەوەیە:

 

تێبینی: بەهۆی ئەوەی بەشێك لەئەنجامەكان ژمارەكان زۆر كەمن، بۆیە لەنەخشەكە یان چارت دەرنەكەوتووە.

 

1 - یەکێتی ئێستا یەک دەنگ و یەک بریارە؟

ژمارەی دەنگدان:1575

بەڵێ: 13.1%

نەخێر: 86.9%

 

2 - سیاسەتی یەكێتی لەئاست خواستی خەڵك و جەماوەرەکەیەتی؟

 ژمارەی دەنگدان:1588

بەڵێ: :6.2%

نەخێر: 93.8%

 

3 - پێتباشە یەكێتیی لە حکومەت بمێنێتەوە؟

 ژمارەی دەنگدان: 1547

بەڵێ: 31.3%

نەخێر:68.7%

 

4 - ئایا یەکێتی رۆڵی  لە بریاردانی سیاسی لە هەرێم  هەیە؟

ژمارەی دەنگدان: 1588

بەڵێ: 15.6%

نەخێر: 84.4%

 

5 - كارەکانی تیمی یەکێتی (جێگری سەرۆک حکومەت و سەرۆکی پەرلەمان و وەزیرە یەکێتیەکان) چۆن هەڵدەسەنگێنیت؟

ژمارەی دەنگدان: 1592

زۆر باش: 1.9%

باش: 3.1%

ناوەند: 10.7%

خراپ: 20.5%

زۆر خراپ: 63.8%

 

6 - ئەم سەركردایەتی و مەكتەب سیاسیەی ئێستای یەكێتیی،  لەبڕیاردانی یەكێتیی رۆڵیان هەیە؟

 ژمارەی دەنگدان: 1579

بەڵێ: 8.4 %

نەخێر: 91.6%

 

7 -  بە بروای تۆ توانای  بافڵ تاڵەبانی  بۆ بەڕێوەبردنی یەكێتیی چۆنە؟

 ژمارەی دەنگدان: 1593

زۆر باشە: 8.3%

باشە: 6.7%

ناوەندە: 13.6%

خراپە: 16.8%

زۆر خراپە: 54.6%

 

8- بە بروای تۆ پۆستی سەرۆک کۆمار سودی بۆ یەکێتی هەیە؟

 ژمارەی دەنگدان: 1580

بەڵێ: 46.1%

نەخێر: 53.9%

 

9- لەهەڵبژاردنەکانی داهاتوو دەنگ بە یەکێتی   دەدەیت؟

ژمارەی دەنگدان: 1531

بەڵێ: 32%

نەخێر: 68%

 

10- بەبروای تۆ بە دووركەوتنەوەی لاهور شیخ جەنگی لەبڕیاردانی ناوخۆی یەكێتیی ئاستی دەنگدەری یەکێتی چی لێهاتوە؟

ژمارەی دەنگدان: 1593

زۆر زیادی کردووە: 1.7%

زیادی کردووە: 1.1%

وەک خۆیەتی: 5.9%

کەمی کردووە: 15.1%

زۆر کەمی کردووە: 76.2%

 

11- بە بروای تۆ  گەرانەوەی لاهور شیخ جەنگی کاریگەری دەبێت لەسەر ئاستی دەنگی یەكێتیی لە هەڵبژاردنی داهاتودا؟

ژمارەی دەنگدان: 1590

بەڵێ: 91.6%

نەخێر: 8.4%

 

12- پێتوایە ئێستا یەکێتی بۆتە حزبێکی بنەماڵەیی؟

 ژمارەی دەنگدان: 1574

بەڵێ: 89.1%

نەخێر: 10.9%

 

13- لە دوای رووداوەکانی 8ی تەموزی 2021 دۆخی یەکێتی چۆن دەبینیت؟

 ژمارەی دەنگدان: 1588

زۆر باش: 3%

باش: 3.8%

ناوەند: 8.2%

خراپ: 14.9%

زۆر خراپ: 70.1%

 

14- وەک کادیرو دەنگدەرێکی یەکێتی پێتباشە کام لە کورەکانی مام جەلال سەرکردایەتی یەکێتی بکات؟

ژمارەی دەنگدان: 1574

بافڵ تاڵەبانی: 15%

قوباد تاڵەبانی: 3.4%

هەردوکیان: 4.5%

هیچیان: 77.1%

زۆرترین بینراو
© 2022 Awene Online, Inc. All Rights Reserved.
×