سەرۆكی لیژنەی دارایی لە پەرلەمانی كوردستان ڕایگەیاند، ڕاپۆرتێكی گشتگیر ئامادەكراوە تایبەت بە چەند پرسێكی گرنگی پەیوەست بە موچەخۆران و هاوڵاتییان، دەشڵێت، پاشەكەوتی موچە و پلەبەرزکردنەوە بڕگەیەكی سەرەكی ڕاپۆرتەكەیانە.
ئاوێنە: زیاد جەبار، سەرۆكی لیژنەی دارایی لە پەرلەمانی كوردستان لە فراکسیۆنی یەکێتی، ئەمڕۆ هەینی بە میدیای حزبەکەی ڕاگەیاند، "لە لیژنەكەمان ڕاپۆرتێكی گشتگیر ئامادەكراوە كە چەند بڕگەیەكی گرنگ لە خۆدەگرێت، لەوانە دەستپێكردنەوەی پلەبەرزكردنەوەی فەرمانبەران كە ماوەی شەش ساڵە بەنایاسایی ڕاگیراوە و لەگەڵ نەبونی یاسای بودجە كە هەرێمی كوردستان هەشت ساڵ زیاترە یاسای بودجەی نییە".
ئاماژەی بەوەشکردوە، حكومەت قەرزی لای موچەخۆرانەو ماوەی چەند ساڵێكیش پاشەكەوت لەسەر موچە كراوە بۆیە دەتوانرێت قەرزەكانی حكومەت لە موچە پاشەكەوتكراوەكان بدرێنەوەو جۆرێك لە "مقاصە" لە نێوان قەرزەكاندا بكرێن.
سەرۆكی لیژنەی دارایی باسی لەوەشكردوە، ڕاپۆرتەكەیان ئامادەكردوەو سەرقاڵی ڕێكخستنەوەین و دواتر دەخرێتە بەردەم دەستەی سەرۆكایەتیی پەرلەمان بەمەبەستی بانگێشتكردنی وەزیری دارایی و هەر كاتێك ئامادەی كۆبونەوەی پەرلەمان بو ئەوا ڕاپۆرتەكە تاوتوێ دەكرێت و بڕیاری لەبارەوە دەدرێت.