میدیاكانی ئێران، ئێوارەی ئەمڕۆ پێنجشەممە، بڵاویان كردەوە كە وریا غەفوری، كاپتنی پێشوی یانەی ئیستقلالی تاران و پاریزانی پێشوی هەڵبژاردەی تۆپی پێی ئێران، كە خەڵكی سنەی رۆژهەڵاتی كوردستانە، لەلایەن هێزە ئەمنییەكانەوە دەستگیركراوە.
ئاوێنە: بەپێی ئاژانسی تەسنیم، نزیك لە سوپای پاسداران، وریا غەفوری كە لە ئێستادا بۆ یانەی "فولادی خوزستان" یاری دەكات، بە تۆمەتی "سوكایەتی و تێكدانی ریزی هەڵبژاردەی تۆپی پێی ئێران" و "پڕوپاگەندە دژ بە رژێمی كۆماری ئیسلامی" دەستگیركراوە.
میدیاكانی ئێران، وردەكاری ئەو تۆمەتی سوكایەتییەیان نەخستۆتەڕو كە دراوەتە پاڵ وریا غەفوری، بەڵام پێدەچێت، ستۆرییەكی ئەو كە بەم دواییانە لە لاپەڕەی ئینستاگرامی خۆی داینابو، هۆكاری دەستگیركردنی بێت كە لەبارەی هەڵبژاردەی تۆپی پێی ئێرانەوە نوسیبوی: "بێ شەرەف، بێ شەرەف."
وریا غەفوری، كە لە دایكبوی شاری سنەی رۆژهەڵاتی كوردسنانە، لەم هەفتانەی دواییدا بەتایبەت پاش روبەڕوبونەوەی خوێناوی هێزە ئەمنییەكانی ئێران بەرامبەر بە ناڕەزاییەكانی رۆژهەڵاتی كوردستان، بەتوندی هەڵوێستی دژبە كۆماری ئیسلامی وەرگرتوەو خوازیاری كۆتاییهێنان بوە بە كۆمەڵكوژی كوردان لەسەر دەستی هێزە ئەمنییەكانی ئێران.
وریا غەفوری، لەم ساڵانەی دواییدا لەبارەی ناڕەزایەتییەكانی خەڵكی ئێران دژبە رژێمی كۆماری ئیسلامی، بەردەوام هەڵوێستی هەبوەو پشتیوانی لە ناڕەزایەتییەكانی خەڵك كردوە.
دەسەڵاتدارانی كۆماری ئیسلامی تاوەكو ئێستا جگە لە وریا غەفوری، چەند یاریزانێكی دیكەی تۆپی پێی وڵاتەكەیان بە تۆمەتی "دژایەتی و تێكدانی ئاسایشی وڵات" دەستگیركردون لەوانە، پەروێز برومەند، حسێن ماهینی، حەمیدڕەزا عەلی عەسكەری و لێپێچینەوەشیان لەگەڵ ژمارەیەكی دیكەی یاریزانانی تۆپی پێ كردوە، ئەوەش بەهۆی پشتیوانیكردنی ئەو یاریزانانە لە خۆپیشاندان و ناڕەزایەتییەكان.