ئێوارەی ئەمڕۆ چوارشەممە، لە شاری ناسریەی ناوەندی پارێزگای زیقار، خۆپیشاندان بەڕێوەچو و بەهۆی دروستبونی گرژی لەنێوان خۆپیشاندەران و هێزێكی سوپای عێراقدا، سێ خۆپیشاندەر كوژراون و نزیكەی 20 كەسیش برینداربون.
ئاوێنە: خۆپیشاندانەكانی ناسریە بۆ پشتیوانیكردن لە چالاكوانی مەدەنی حەیدەر زەیدی، دەستیان پێكرد كە سزای سێ ساڵ زیندانی بەسەردا سەپێنراوە بەتۆمەتی سوكایەتیكردن بە حەشدی شەعبی و هەروەك خۆپیشاندەران داوای موچەی بریندارانی خۆپیشاندانەكانی تشرینییەكانیش دەكەن.
بەگوێرەی میدیا عێراقییەكان لەخۆپیشاندانەكانی ئەمڕۆی ناسریەدا بەهۆی دروستبونی گرژی و پێكدادان لەنێوان خۆپیشاندەران و هێزێكی سوپادا، سێ خۆپیشاندەر كوژراون و 20 كەسی دیكەش برینداربون.
بەپێی سەرچاوە ئەمنییەكانی پارێزگاكە، هەشت بریندار گوازراونەتەوە بۆ نەخۆشخانەی ناسرە لەوانەش دوانیان گیانیان لەدەستداوەو هەروەها 15 برینداریش گەیەندراوەتە نەخۆشخانەی حەبوبی شارەكە كە یەكێكیان گیانی لەدەستداوە.