١٨ كەسایەتی و ١٩ دامەزراوەی ئێرانی خرانە سەر لیستی سزاكان
  2023-01-24       136       


وڵاتانی یەكێتی ئەوروپا، بەهۆی رۆڵیان لە سەركوتكردنی ئەو خۆپیشاندانانەی كە لە دوای گیان لەدەستدانی ژینا ئەمینی بەڕێوەچوون، بڕیاری جێبەجێكردنی سزای لەسەر ١٨ كەسایەتی و ١٩ دامەزراوەی ئێرانی دەركرد.

ئاوێنه‌: لەو راگەیەندراوەی كە لە كۆنسەی یەكێتی ئەورووپاوە دەرچووە، ئاماژە بەوە كراوە كە سزاكان بەهۆی پێشێلكردنی مافەكانی مرۆڤەوە جێبەجێ دەكرێت.

وەزیری وەرزش و لاوانی ئێران سەید حەمید سەجادی، ژمارەیەك لە پەرلەمانتارێك، پارێزگاری چەند پارێزگایەك، كارمەندانی میدیاكانی دەوڵەت و چەند بەرپرسێكی باڵای سوپای پاسداران لەنێو ئەو كەسانەن كە سزاكان دەیانگرێتەوە.

هەروەها لیستەكە، یەكەی چەند ناوچەیەكی سوپای پاسداران لە وڵاتەكە و هێزی پۆلیسی تایبەتی ئێران و چەند كۆمپانیایەك ئەمنی لەخۆدەگرێت.

لەگەڵ دوایین سزادا ژمارەی ئەو كەسایەتییە ئێرانییانەی كە یەكێتی ئەورووپا رێوشوێنی سنوورداركردنی لەسەر جێبەجێ كردوون بۆ ١٦٤ كەسایەتی و ژمارەی دامەزراوەكان بۆ ٣١ بەرزبوویەوە.

سزاكان، پێكدێت لە قەدەغەی گەشتكردن بۆ یەكێتی ئەورووپا، بلۆككردنی سەروەت و ماڵ و قەدەغەی دابینكردنی پارە و تەمویلكردنی ئەو كەسایەتی و دامەزراوانە. جگە لەوە فرۆشتنی هەندێك لەو پێداویستییانەی كە دەكرێت وەكو فشار بۆسەر خەڵك بەكاربهێندرێت و ئامێرەكانی چاودێری قەدەغە دەكرێت.

زۆرترین بینراو
© 2023 Awene Online, Inc. All Rights Reserved.
×