ئەندامێکی ئەنجومەنی نوێنەرانی عێراق ئاشکرایکرد، سەرۆک کۆمار ئاماژەی بەوەکردووە، هەوڵەکان چڕبوونەتەوە بۆ پێکهێنانەوەی دادگای فیدراڵی، چونکە لە سەرەتای پێکهێنانیدا بەشێکی زۆر لە لایەنە سیاسییەکان لەگەڵ پێکهێنانیدا بەو فۆڕمە نەبوون.
ئاوێنه: شوان محەمەد، ئەندامی ئەنجومەنی نوێنەرانی عێراق لە لێدوانێکی رۆژنامەوانیدا ئاماژەی بەوەکردووە:" لەگەڵ د.لەتیف رەشید، سەرۆک کۆماری عێراق کۆبووینەتەوە و چەند پرسێکمان تایبەت بە دوایین پێشهاتەکانی وڵات و پرسی کورد تاوتوێکردووە".
ئەوەشی خستووەتەڕوو:" لە بەشێکیتری کۆبوونەوەکەدا، بڕیارەکانی دادگای فیدراڵی سەبارەت بە هەرێمی کوردستان خراوەتە بەرباس و سەرۆککۆمار باسیلەوەکردووە، هەوڵەکان بۆ پێکهێنانەوەی دادگای فیدراڵی لەلایەن لایەنە سیاسییەکان چڕبوونەتەوە، بەو پێیەی لەسەرەتادا بەشێکی زۆر لە لایەنەکان، لەگەڵ پێکهێنانی دادگای فیدراڵی بەو فۆڕمەی ئێستا نەبوون".
راشیگەیاندووە:" لەگەڵ سەرۆککۆمار گفتوگۆمان دەربارەی پێکهێنانی ئەنجومەنی فیدراڵی کردووە، کە ئێستا هەوڵ هەیە بەپێی ماددەی ٦٥ی دەستووی عێراق و پێکهێنانەوە دادگای فیدراڵی بەپێی ماددەی ٩٢ی دەستوور".