سوپای پاسدارانی ئێران هێرشە درۆنیەکەی سەر ماڵی سەرۆکی هەرێمی کوردستانی لە دهۆک سەرکۆنە کرد و دەڵێت "ئەو هێرشە نموونەی کردەوەیەکی تیرۆریستییە لە لایەن دوژمنە دەستدرێژکارەکانەوەیە کە بەرپرسە باڵاکانی ئێرانی کوشتووە".
ئاوێنە: سوپای پاسدارانی کۆماری ئیسلامی ئێرن لە میانی راگەیەندراوێکدا ئاماژە بەوەدەکات، "هێرشی درۆنی بۆسەر ماڵی سەرۆکی هەرێمی کوردستان لە دهۆک، نموونەی کردەوەیەکی تیرۆریستییە لە لایەن دوژمنە دەستدرێژکارەکانەوە".
سوپای پاسداران لە راگەیەندراوەکەیاندا ئەمریکا تاوانبار دەکەن بەو هێرشە و دەڵێت "پێشینەکەیمان لە ڕۆژانی ڕابردوودا لە تیرۆرکردنی نامەردانەی بەرپرسانی باڵای ئێرانی و خەڵکی ستەملێکراوی ئێران لەلایەن سوپا تیرۆریستەکانی ئەمریکا و سەهیۆنیستەوە بینیوە".
زیاتری ئاشکراکرد "ئەم کردەوە تیرۆریستییانە گوزارشت لە هەوڵی گڵاوی دوژمنە شەڕخوازەکان دەکەن بۆ زیان گەیاندن بە ئاشتی، سەقامگیری و هاوکارییە ناوچەییەکانی نێوان هەرێمی کوردستان و وڵاتانی دراوسێ".
راشیگەیاندووە "سوپای پاسداران ئەم دەستدرێژییە تیرۆریستییە سەرکۆنە دەکات و ئامادەیی خۆی ڕادەگەیەنێت بۆ پشتگیریکردن و بەرگریکردن لە ئاسایشی دراوسێکان لە ڕێگەی بەهێزکردنی هاوکارییە ئەمنییەکان و دروستکردنی قەڵغانێکی بەرگریی بەکۆمەڵ لە ناوچەکەدا لە لایەن وڵاتان و ئەکتەرە ناوچەییەکانەوە، لەبەرامبەر شەڕانگێزییەکانی سوپای ئەمریکا و ڕژێمی سەهیۆنیستیدا".