ئەندامێکی پەرلەمانی عێراق دواین پێشهات لەسەر مووچەی مانگی ٤ی هەرێم ئاشکرا دەکات و دەڵێت "هەرێم هاوشێوەی مانگی پێشوو بۆ ناردنی مووچە لەگەڵ بەغدا لەسەر مەقاسە رێکدەکەون، بەمەیش هەواڵەکان ئومێد بەخشن کە مووچە دواناکەوێت".
ئاوێنە: جەمال کۆچەر، ئەندامی پەرلەمانی عێراق لەسەر فراکسیۆنی یەکگرتووی ئیسلامی کوردستان لەلێدوانێکدا بە ئاوێنەی راگەیاند "ناردنی مووچە کەوتووەتەوە سەر هەرێم کە لیست و داهاتی ناوخۆ دوانەخەن، چونکە گاز لەرێگەی بۆری هەرێمەوە بەردەوامە".
ناوبراو باس لەوەدەکات کە مانگی پێشوو هەرێم وتویەتی بە عێراق؛ پارەیان نییە تەواوی داهاتی ناوخۆ بنێرن و لەسەر "مەقاسە رێککەوتوون"، هەربۆیە ئەو لەو باوەڕەدایە کە ئەم مانگەش بەوجۆرەیە دەبێت.
جەمال کۆچەر 'مەقاسە' روندەکاتەوە و دەڵێت "مەقاسە ئەوەیە؛ مووچەی هەرێم لە بەغدا ٩٥٦ ملیار دینارە و هەرێمیش بۆ داهاتی ناوخۆ ١٢٠ ملیار دینارە، بەنمونە هەرێم ناتوانێت ١٢٠ ملیارەکە بنێرێت تەنیا ٥٠ ملیار دەنێرێت، بەغدا لەلای خۆیەوە ئەو ٥٠ ملیارە دەبڕێت لە بڕە سەرەکیەکە (٩٥٦ ملیار دینار) و مووچەکە دەنێرێت".
ئەندامەکەی پەرلەمانی عێراق ئاشکرایکرد کە تاوەکو ئێستا دابەشکردنی مووچەی مانگی ٤ لە عێراق دەستیپێنەکردووە، وتیشی "هەرێم لەکاتی خۆیدا لیست و داهات بنێرێت عێراقیش زوو تەمویلی مووچە دەکات. من پێموانییە مووچە بفەوتێت و دوابکەوێت".