موراد قەرەیلان، ئەندامی فەرماندەیی ناوەندی پاراستنی گەل (نەپەگە)، لە نوێترین هەڵسەنگاندنیدا بۆ بارودۆخی سیاسی، ڕایگەیاند کە پڕۆسەی ئاشتی و چارەسەری بە کرداری لەلایەن دەوڵەتی تورکیاوە ڕاگیراوە و هەڵپەسێردراوە. قەرەیلان جەختی کردەوە کە بەبێ هەنگاوی یاسایی و دیاریکردنی پێگەی ئازادی بۆ عەبدوڵا ئۆجەلان، پڕۆسەکە ناچێتە پێشەوە.
ئاوێنە: ئەمڕۆ پێنجشەممە، ٣٠ی نیسانی ٢٠٢٦، موراد قەرەیلان، ئەندامی فەرماندەیی ناوەندی پاراستنی گەل (نەپەگە) لە چاوپێکەوتنێکدا ئاشکرایکرد، دەسەڵاتی تورکیا بە ئاراستەی چارەسەری پرسی کورد و سەرخستنی پرۆسەی ئاشتی و دیموکراتی هیچ هەنگاوێکی روونی نەناوە و بەردەوامە لە سەپاندنی ئیرادەی تەسلیمکردن، هەربۆیە پرۆسەکە وەستێندراوە.
ڕاگرتنی پڕۆسەکە: قەرەیلان ئاماژەی بەوە کرد کە دەوڵەت لەبری هەنگاوی کۆنکرێتی، سیاسەتی "ڕادەستبوون" دەسەپێنێت و پڕۆسەکەی وەک ئامرازێکی "تاکتیکی و هەڵبژاردن" بەکارهێناوە، نەک ستراتیژی.
مەرجی سەرەکی بۆ چەکدانان: ڕایگەیاند کە پرسی چەکدانان تەنها لەژێر سەرپەرشتی ڕاستەوخۆی عەبدوڵا ئۆجەلان و دوای ئازادیی جەستەیی ئەو دەبێت؛ بەبێ گەرەنتی یاسایی، چەکدانان لە ناوچەیەکی پڕ ململانێی وەک ڕۆژهەڵاتی ناوەڕاستدا "دوورە لە عەقڵ".
جێبەجێکردنی ئەرکەکان: جەختی کردەوە کە تەڤگەرەکەیان هەموو ئەرکەکانی خۆی جێبەجێ کردووە، لەوانە ڕاگەیاندنی ئاگربەست، گۆڕینی مانیفێستۆ بۆ "کۆمەڵگەی دیموکراتیک" و سووتاندنی چەکەکان لە هەندێک ناوچە وەک نیشاندانی نیازپاکی.
بەردەوامیی گۆشەگیری: قەرەیلان ڕەخنەی توندی لە بەردەوامیی گۆشەگیری سەر ئیمراڵی گرت و ڕایگەیاند کە نادادپەروەرییەکی گەورەیە ڕێگری لە ئۆجەلان بکرێت فکری خۆی بۆ کۆمەڵگە ڕوون بکاتەوە.
پەیام بۆ تورکیا: داوای کرد دەوڵەت لەبری عەقڵییەتی "ئەمنی و نکۆڵیکردن"، گۆڕانکاری لە پارادایمی خۆیدا بکات و هاوپەیمانی لەگەڵ کورد وەک تاکە ڕێگە بۆ بوون بە هێزێکی گەورە لە ناوچەکەدا ببێنێت.
قەرەیلان جەختی لەوەش کردەوە "چیتر نە نکۆڵی و نە یاخیبوون؛ بەڵکوو خوشک-برایەتی و هاوپەیمانی ستراتیژی لەسەر بنەمای ئازادی، تاکە ڕێگەی چارەسەرییە."