سەرۆکی تورکیا باس لەوەدەکات کە دەزگای هەواڵگری وڵاتەکەی کاردەکات بۆ خێراکردنی پرۆسەی داماڵینی چەک، بەڵام "کەسانێک دژمانن".
ئاوێنە: رەجەب تەیب ئەردۆغان، سەرۆككۆماری توركیا لەكاتی گەڕانەوەیدا لە گەشتەكەی لە كازاخستان لەناو فرۆِكەكەیدا بە رۆژنامەنوسانی وت "دەزگای هەواڵگری وڵاتەكەمان کاردەکات بۆ خێراکردنی پرۆسەی داماڵینی چەک، راستییەکەش ئەوەیە، وەک چۆن کەسانێک هەبوون کە هەر لە سەرەتاوە بانگەشەیان بۆ دەکرد و ماندوو نەناسانە کاریان دەکرد بۆ سەرکەوتنی ئەم پرۆسەیە، هەروەها کەسانێک هەبوون لێی ناڕازی بوون".
ناوبراو وتیشی "سەرەڕای ئەو سەختییانەی کە رووبەڕووی دەبنەوە، پرۆسەکە گەیشتووەتە ئەم قۆناغە، ئێمە پێداگرین و ئەو کەسانە دڵخۆش ناکەین کە تورکیایەکی بێ تیرۆریان ناوێت، ئێمە ئیرادەمان هەیە و دەرفەتیان پێ نادەین".
ئەردۆغان دووپاتیکردەوە "نیەتمان پاكە و رێگاکەمان راستە و ئەنجامەکانمان ئەرێنی دەبێت، بێ گومان ئامانجی خۆمان کە 'تورکیایەکی بێ تیرۆر'ە، بە شكۆوە بەسەر هەموو ئاستەنگەکاندا سەردەكەوین".