لە ناوەڕاستی دووبارەبوونەوەی هەڕەشەکانی بۆ سەر ئێران لە چەند ڕۆژی ڕابردوودا، سەرەڕای بەردەوامی دانوستانەکان لە ڕێگەی نێوەندگیری پاکستانییەوە، دۆناڵد ترەمپ، سەرۆکی ئەمریکا پێی وایە "ئێرانییەکان بە سەختی تامەزرۆی واژۆکردنی ڕێککەوتنێکن" کە کۆتایی بەو جەنگە بهێنێت کە لە ٢٨ی شوباتی ڕابردوودا هەڵگیرسا.
ئاوێنە: ترەمپ لە چاوپێکەوتنێکدا لەگەڵ گۆڤاری "فۆڕچون" کە ئەمڕۆ دووشەممە بڵاوکراوەتەوە، وتیشی: "ئێرانییەکان لە دەست دەرئەنجامەکانی جەنگ دەقیژێنن"، بەپێی گوزارشتەکەی خۆی.
هەروەها ئاماژەی بەوەشکرد کە ئێران "باس لە ڕێککەوتن دەکات و دواتر کاغەزێک پێشکەش دەکات کە هیچ پەیوەندییەکی بە هیچ خاڵێکەوە نییە"، ئەوەش وەکو ئاماژەیەک بۆ گۆڕینی هەڵوێست و مەرجەکانی.
"بەردەوامن لە گۆڕینی مەرجەکانیان"
ئەمە لە کاتێکدایە کە پێشتر لەمڕۆدا ئێران ڕایگەیاند کە وەڵامی پێشنیازێکی نوێی ئەمریکای داوەتەوە کە ئامانج لێی کۆتایهێنانە بە جەنگەکە، وتیشی پەیوەندییەکان هێشتا لە ڕێگەی پاکستانەوە بەردەوامن. ئیسماعیل بەقایی، وتەبێژی وەزارەتی دەرەوە لە کۆنگرەیەکی ڕۆژنامەوانیدا وتی: "وەک چۆن دوێنێ ڕامانگەیاند، نیگەرانییەکانمان گەیاندووەتە لایەنی ئەمریکی".
هەروەها وتیشی پەیوەندییەکان هێشتا "لە ڕێگەی نێوەندگیری پاکستانییەوە بەردەوامن"، بەبێ ئەوەی هیچ وردەکارییەکی دیکە بخاتەڕوو.
لە کاتێکدا سەرچاوەیەکی پاکستانی ئاشکرایکرد کە شەوی ڕابردوو وڵاتەکەی پێشنیازێکی هەموارکراوی ئێرانی پێشکەش بە لایەنی ئەمریکی کردووە. جەختیشی لەوە کردەوە کە هەردوو وڵات بەردەوامن لە گۆڕینی مەرجەکانیان، ئەمەش بەپێی ئەوەی ئاژانسی "رۆیتەرز" گواستوویەتیەوە.
دوێنێش ترەمپ هۆشداری توندی ئاراستەی تاران کرد و جەختی لەوە کردەوە کە کات خەریکە بەرەو تەواوبوون دەچێت. لە پۆستێکدا لەسەر پلاتفۆرمی تروس سۆشیاڵ (Truth Social) وتی: "باشترە بۆیان بە خێرایی بجوڵێنەوە، ئەگەرنا هیچ شتێکیان لێ نامێنێتەوە"، بەپێی گوزارشتەکەی خۆی.
لە کاتێکدا لایەنی ئێرانی باسی لە "ڕەتکردنەوەی ئەمریکا بۆ پێشکەشکردنی سازش، و پابەندبوون بە مەرجی قبوڵنەکراو" کردووە، وەک ئەوەی میدیا ئێرانییەکان بڵاویانکردووەتەوە.
ئەمە و ئێران داواکارییەکەی واشنتۆن بۆ گواستنەوەی بڕی یۆرانیۆمی پیتێنراو بە ڕێژەی بەرز بۆ ئەمریکا ڕەتدەکاتەوە، سەرباری هێشتنەوەی تەنیا یەک دامەزراوەی ئەتۆمی ئێرانی لە کارکردندا.
هەروەها لایەنی ئێرانی پێداگرە لەسەر هەڵگرتنی قەدەغە لەسەر سەرجەم پارە سڕکراوەکانی ئێران لە دەرەوە، لە کاتێکدا ئەمریکا ئاماژە بە ڕەزامەندی خۆی دەکات بۆ هەڵگرتنی قەدەغەکە تەنیا لەسەر ڕێژەی ٢٥٪.