ئێران خۆی ئامادە دەکات بۆ دەستپێکردنەوەی مامەڵەکان لە بازاڕی پشکەکاندا لەم هەفتەیەدا، ئەمەش دوای ڕاگرتنێک کە بۆ ماوەی 80 ڕۆژ بەردەوام بوو، وەک ئەوەی دەستەی کاغەزە داراییەکان و بۆرسەی ئێران ڕایگەیاندووە.

ئاوێنە: ئاژانسی فەرمی هەواڵەکانی ئێران لە دەستەکەوە گواستوویەتیەوە کە بڕیاری دووبارە کردنەوەی بازاڕەکە، مامەڵەکردنی پشکەکان و سندووقەکانی وەبەرهێنان دەگرێتەوە، لەگەڵ جێبەجێکردنی حزمەیەک لە ڕێکاری ڕێکخستن کە ئامانجیان کەمکردنەوەی گۆڕانکاری و ناجێگیرییەکانە؛ لەوانەش بەرتەسککردنەوەی مەودای هەڵبەز و دابەزینی ڕۆژانەی نرخەکان و کاراکردنی سندووقەکانی جێگیرکردنی بازاڕ، هاوكات لەگەڵ بەهێزکردنی چاودێری بەسەر میکانیزمەکانی نرخاندندا.

بەپێی میدیا فەرمییەکان، ڕاگرتنی مامەڵەکان بە ئامانجی پاراستنی دارایی و سەرمایەی وەبەرهێنەران بووە لە ماوەی گرژییە هەرێمییەکاندا، و بۆ ڕێگریکردن لە پرۆسە بەرفراوانەکانی فرۆشتن کە ڕەنگە کاربکاتە سەر سەقامگیری بازاڕەکە.

گەڕانەوە بۆ مامەڵەکردن، دەستپێکردنەوەی پرۆسەکانی کڕین و فرۆشتنی پشکەکان، سندووقەکانی خاوەندارێتی و داتاشراوە داراییەکان دەگرێتەوە، لەگەڵ درێژکردنەوەی کاتەکانی مامەڵەکردن؛ لە هەنگاوێکدا کە ئامانجی پێدانی کاتی زیادەیە بە کۆمپانیاکان بۆ ئاشکراکردنی داتا داراییەکانیان.

کردنەوەی بازاڕەکە لە کاتێکدا دێت کە هێشتا ئاڵۆزی و تەحەددا ئابوورییەکان بەردەوامن، لەژێر سێبەری سزاکانی ڕۆژاوا و هەڵاوسانی بەرزدا، و پشتبەستنی گەورەی ئابووری ئێران بە بانکەکان و خەرجییەکانی حکومەت وەک سەرچاوەی سەرەکی بۆ دابینکردنی دارایی.

خەمڵاندنە ئابوورییەکان ئاماژە بەوە دەکەن کە دووبارە کارپێکردنەوەی بۆرسە ڕەنگە ببێتە تاقیکردنەوەیەک بۆ متمانەی وەبەرهێنەران، لەکاتێکدا بەشێک لەوان لە ماوەی درێژخایەنی ڕاوەستانەکەدا ڕوویان لە داراییە بەدیلەکان کردووە وەک دراوە بیانییەکان، زێڕ و خانوبەرە.