حکومەتی هەرێمی کوردستان هەنگاوێکی گەورە بۆ خزمەتکردنی منداڵانی ئۆتیزم و خاوەن پێداویستییە تایبەتەکان دەنێت. لەم چوارچێوەیەدا، کوێستان محەمەد، وەزیری کار و کاروباری کۆمەڵایەتی، چەندین بڕیار و پێشهاتەی نوێی ڕاگەیاند، کە دیارترینیان پێشکەشکردنی چارەسەری بێبەرامبەر و ناردنی دۆسیەی هەزاران کەمئەندامە بۆ حکومەتی فیدراڵی، بە مەبەستی دابینکردنی موچە بۆیان لە پرۆژەیاسای بودجەی ساڵی 2026ـدا.
ئاوێنە: لە کۆنگرەیەکی ڕۆژنامەوانیدا کە ئەمڕۆ دوشەممە بەڕێوەچو، وەزیری کار و کاروباری کۆمەڵایەتی گەشەسەندنێکی بێوێنەی لە سێکتەری خزمەتگوزارییەکانی ئۆتیزم ئاشکرا کرد. ناوبراو ئاماژەی بەوە دا کە بەهۆی کەمکردنەوەی ڕۆتین و ئاسانکارییەکانی وەزارەتەکەیان بۆ کەرتی تایبەت، ژمارەی سەنتەرەکانی تایبەت بە ئۆتیزم لە 11 سەنتەرەوە بۆ 69 سەنتەر بەرزبوەتەوە (13 سەنتەری حکومی و 56 سەنتەری ئەهلی). ئەم زیادبونە و دروستبونی کێبڕکێ، هۆکارێکی سەرەکی بوە بۆ دابەزینی نرخی چارەسەر و ڕاهێنانەکان لە بەرژەوەندی خێزانەکان.
لە درێژەی قسەکانیدا، کوێستان محەمەد باسی لە هەمواری ڕێنماییەکانی تایبەت بە مۆڵەتی بەخێوکەر کرد و وەک دەستکەوتێک بۆ خێزانەکان خستیەڕو. بەپێی گۆڕانکارییە نوێیەکان:
ئەو خێزانانەی کە لە یەک منداڵی ئۆتیزمیان زیاترە، مافی ئەوەیان پێدراوە کە هەردو دایک و باوکەکە مۆڵەتی فەرمی وەربگرن بۆ چاودێریکردنی منداڵەکانیان.
تا ئێستا 569 کەس لەم مافە سودمەند بون.
لە ئێستاشدا زیاتر لە هەزار و 700 منداڵ لە سەنتەرەکاندا سەرقاڵی وەرگرتنی خزمەتگوزاری فێربون و چارەسەرن.
سەبارەت بە شایستە داراییەکانی ئەم توێژە، وەزیری کار جەختی لەسەر هەوڵە چڕەکانی وەزارەتەکەی کردەوە و ڕایگەیاند: "دۆسیەی 16 هەزار کەمئەندام و منداڵانی ئۆتیزممان ئاراستەی بەغدا کردوە، تاوەکو لە بودجەی 2026ـدا تەرخانی داراییان بۆ بکرێت." بۆ زیاتر بەدواداچونی ئەم پرسەش، بڕیارە تیمێکی تایبەتی وەزارەت سەردانی بەغدا بکەن، بۆ ئەوەی دڵنیابن لەوەی زۆرترین ژمارەی ئەو منداڵانە دەبنە خاوەنی موچەی مانگانە.
لە بەشێکی دیکەی کۆنگرە ڕۆژنامەوانییەکەدا، وەزیری کار دو بڕیاری گرنگی سەرۆکی حکومەتی بۆ ئاسانکاری منداڵانی ئۆتیزم ڕاگەیاند، کە بریتین لە:
پشکنین و چارەسەری بێبەرامبەر لە سەرجەم نەخۆشخانە حکومییەکانی هەرێمی کوردستان.
پێدانی مافی لەپێشینەیی و ڕاییکردنی خێرای مامەڵەکانیان لە فڕۆکەخانەکاندا بەبێ چاوەڕوانی.
پاشخان: ئۆتیزم چییە و چۆن مامەڵەی لەگەڵ دەکرێت؟
ئۆتیزم حاڵەتێکی تێکچونی گەشەی مێشکە کە کاریگەری ڕاستەوخۆ دەکاتە سەر توانای ئاخاوتن، پەیوەندیکردن و تێکەڵبونی کۆمەڵایەتی. ئەو کەسانەی توشبوی ئەم حاڵەتەن، زۆرجار لە دەربڕین و تێگەیشتن لە هەستی کەسانی چواردەوریان کێشەیان بۆ دروست دەبێت، هەروەها هەندێک جوڵەی دوبارە یان پابەندبونێکی توند بە ڕۆتینی ڕۆژانەیان پێوە دیارە.
پێویستە بزانرێت کە ئەم بارودۆخە نەخۆشییەکی کاتی نییە تا بە دەرمان بنەبڕ بکرێت، بەڵکو جۆرێکە لە جیاوازی لە شێوازی کارکردنی مێشکدا. شارەزایان جەخت لەوە دەکەنەوە کە باشترین ڕێگە بۆ یارمەتیدانیان، بریتییە لە زو دەستنیشانکردنی حاڵەتەکەیان و ناردنیان بۆ سەنتەرەکانی ڕاهێنان، بۆ ئەوەی کارامەییەکانیان پەرەپێبدەن و بە شێوەیەکی باشتر لەگەڵ کۆمەڵگەدا بگونجێن.