لەسەروبەندی نووسینەوەی دەستوری عیراق لەساڵی ٢٠٠٥دا بە سەردانێک چوومە لای کاک نەوشیروان مستەفا لە ماڵەکەی خۆی لە( گردی عەلی ناجی ) بە نیازی سازدانی دیدارێکی رۆژنامەوانی لەگەڵیدا بۆ رۆژنامەی ( الشرق الأوسط ) کە ئەوسا من بەڕێوەبەری نووسینگەیان بووم لەهەرێمی کوردستان . ئەو کاتەش کاک نەوە وەکو جێگری سکرتێری گشتی یەکێتی ناسرابوو .
لەدیمانەکەدا کاک نەوشیروان قسەیەکی زۆر گرنگی کرد کە دواتر من کردمە ( مانشێتێکی گەورەی ) دیدارەکە کاتێ وتی ( ئێمە لەعیراقدا وەکو پێکهاتەی کورد هەمیشە پۆستی جێگرانمان پی ڕەوا بینراوە . ئەمجارە ئەمانەوێ یەک پۆستی سەرۆکایەتیمان پێبدەن تەنانەت ئەگەر هی تیپێکی تۆپی پێش بێت ) !.
ئەم واقیعە وەکو هەموو مییراتەکەی رژێمی بەعس کە دەقاودەق گواسترایەوە ناو هاوکێشەی سیاسی لە هەرێمی کوردستان وزۆربەی حزبەکان پیادەی دەکەن لە شێوازی حوکمڕانی تاکڕەوو پەرواێزخستنی لایەنی بەرامبەر ، ئێستاش بە هەمانشێوە پارتی دەیەوێ هەمان سیاسەت لەمڕۆژنەدا پەیڕەو بکات بۆ دابەشکردنی دەسەڵاتەکان لەهەرێمدا . ئەوەتا جارێکتر سەرکردایەتی پارتی چاویان بڕیوەتە پۆستی سەرۆکی کۆمار کە بە هیچ بنەمایەک و بەهیچ دەستوورێک مافی ئەوەیان نیە ئەم پۆستە وەربگرن .
پرۆسەی سیاسی عیراق دوای رووخانی رژێمی صەدام لەسەر چەند بنەمایەکی دەستووری وعورفی سیاسی بنیاتنراوە . کاتێک پۆستە سیادییەکانی عیراق لەنێوان پێکهاتەکانی عیراق دابەشکرا ، پۆستی سەرۆک کۆمار بۆ کوردو پۆستی سەرۆک وەزیران بۆ شیعەو پۆستی سەرۆکی پەرلەمانیش بۆ سوننە . ئەمە بە تەواوی و بەدرێژایی بیست ساڵی رابردوو وەکو عورفێکی سیاسی چەسپێندراوە . لێڕەدا پێویستە بوترێ کەوا فەرامۆش کردنی ئەم عورفە وپەراوێزخستنی هەر پێکهاتەیەکی عیراقی مانای رووخان و بە کۆتاهاتنی پرۆسەی سیاسی عیراقە بە گشت لایەنەکانیەوە .
لەولاشەوە لەئەنجامی رێکەوتنێکی ستراتیژی لەنێوان پارتی ویەکێتیدا ، پۆستەکانی هەرێم وبەغداش بە شێوەیەک دابەشکراوە کە پۆستی سەرۆک کۆمار بۆ یەکێتی بێت لەبەرامبەر پۆستی سەرۆکی هەرێم بۆ پارتی . ئەگەر چی لەمەشدا پارتی گۆڵێکی گەورەی لەیەکێتی کردو رەوانشاد مام جەلالی ناردە بەغداو گۆڕەپانەکەی بۆ چۆڵکرا تا ئینفراد بە ساحەی کوردستان بکات و حوکمڕانیەکی تاکڕەو لە کوردستان بچەسپێنێ ، بەڵام دیسان ئەمەش وەکو عورفێکی سیاسی لەکوردستان پەیڕەو کرا .
ئـێستا پارتی چاوی بڕیوەتە پۆستی سەرۆکایەتی کۆمار ودەیەوێ لەدەستی یەکێتی دەریبکات سەرباری ئەوەی کەوا لەکوردستان پۆستی سەرۆکی هەرێمو سەرۆکی حکومەت و سەرۆکی دەزگای ئاسایش و وەزارەتی ناوخۆش بە هێلی سوور ناساندووە . ئەمەش هیچ مەنتقی تێدا نیەو هەوڵێکە بۆ قۆڕخکردنی سەرجەم دەسەڵاتەکان لە هەرێم وعیراقیشدا .
ئەوەی سەیرە دیسان هەمان دوو کاندیدانی پێشتر بۆ ئەم پۆستە ناویان دێ لەکاتێکدا هەردوو کاندید چانسی خۆیان تاقیکردەوە بەڵام سەرنەکەوتن . وەکو موقتەدا صەدریش دەڵێ ( المجرب لا یجرب ) بەڵام پارتی تەنانەت عیبرەت لەم قسەیەش وەرناگرێ .
پرسیارەکە ئەمەیە : سەرۆک کۆمار سەرۆک هەرێم وسەرۆک حکومەت و سەرۆک دەزگای ئاسایش بۆ پارتی بێت ، چی بۆ یەکیتی دەمێنێتەوە ؟. کێشەکە لەوەدایە لە هەرێمی کوردستان هەڵبژاردەیەکی تۆپی پێشمان نیە یەکێتی سەرۆکایەتییەکەی پێبەخشرێ .