دکتۆرا لە ئابوریی سیاسیی نێودەوڵەتی، بەڕێوەبەری ئینستیوتی مێدیتریانە بۆ توێژینەوەی هەرێمایەتی
بۆ دەبەنگ و بێدەماخێک ئاسانترین شت "تەخوین کردن و تەشهیرکردنە"چوونکە هیچی تێناچێ و بیرکردنەوەی ناوێت. ئەو لە مەکتەب (مەکتەبەکە لە قوتابخانەو خوێندنگاکەی ئێوە باشترە) ساقیت بوە، لە سەدا 12 ی هێناوە، باشترین شت ئەوەیە بڵێ خەتای مامۆستاکە بوو، پرسیارەکان قوورس بوون، موبەریدە لە هۆڵی تاقیکردنەوەکە نەبوو!
ئەی بێگومان بەدرێژایی ئەو دە-ساڵەی ڕابردوو هەندێک خەڵک درووست بوون لە دەرەوەی یەكێتی و پارتی ڕووی جاشەکانی ساڵی هەشتاکانیان سپی کردۆتەوە، ئەمە کەلێنە گەورەکە نییە؛ ئەگەر دەستەڵات بۆشایی درووست نەکات ڤایرۆس گەشە-ناکات؛ سەرکردایەتی سیاسیی چوار منداڵ و چوار خەڵکی نە-شارەزا و چەند کاسبکارێکیان ناردوەتە بەغدا؛ ئەمانە ناتوانن و نەیانتوانیوە ئاگایان لە "پرسی کورد" بێت؛ بە سەدان مەکتەبی سیاسی و پەرلەمانتار و وەزیر و سەرکردایەتی و فەرماندە هەیە بە هەموو ژیانی دەستی بەر کتێبێک نەکەوتوە؛ بڕوای بە خوێندنەوە نییە، گاڵتەی بە مەعریفە دێت، هەر لەبنچینەدا ڕقی دونیای لە خەڵکی خوێنەوار و پرۆپۆزەڵ و شتی وایە؛ ئەمە چۆن دەتوانێ نمایندەیی ئابوریی و دیبلۆماسییمان بۆ بکا؟ دکتۆری پێستە بۆ دزی چۆتە لیژنەی نەوت و گازەوە! ها؛ کوردایەتی ئاوایە؟ ئاوها کوردایەتی دەکرێ؟! تۆ نازانی پیشەسازیی چی یە؛ هاتووی باسی نەتەوەگەرایی دەکەی؟ جا ئەوە لووتبەرزی و دەمهەراشی، بێمنەتی و خۆ-بەشتزانییەکەیان لەولاوە بوەستێ! کورە تۆ چیت؟!
بۆیە واز لەم قسە پڕوپووچانە بهێنن؛ چوونکە لەناو خودی پارتی دیموکراتی کوردستاندا دەیان و بگرە سەدان هەن درووستکراون بۆ دژایەتیکردنی بەرنامەکانی خودی بارزانی و لەباربردنی پرسی کوردو کوردستان؛ بە بەرنامە ئیش لەسەر پڕوپووچکردنی حیزبڕانییەکەشیان دەکەن، بە بەرنامە وادەکەن مرۆڤ ڕقی لە ناوی هەرێمی کوردستان ببێتەوە؛ ئێستا لەو کوردستانە بە سەدان خانەوادەو بنەماڵەو کەسایەتی کۆمەڵایەتی و ئەکادیمیی هەن لەبەر خاتری خودی بارزانی شتێک ناکەن و ناڵێن، ئەگینا لە "خورشید" زیاتریان پێیە بۆ کردن و بۆ وتن. بۆ یەکێتی نیشتیمانیش ئەوە هەر قسە هەڵناگرێ؛ سەرکردە! هەیە ئەوەندەی قسە لەگەڵ ئەودیو دەکات ئەوەندە لەم دیو نایکات!
بە کورتی؛ ئیدارەی نەوت و غاز و هەموو لق و سەرچاوەکانی دیکەی وزە بە دامەزراوە دەکرێ؛ دامەزراوەش دەبێت بەرنامەو ستراتیجی ڕوون، دونیابینییەکی ئەقڵانی و سەردەمییانە لە پشتییەوە بوەستێت! بە تەلەڤزیۆن دانان و ڕاگرتنی لەشکرێک پەیجەوان و جنێوەوان دەگەی بە کوێ! عەزیزم کەی ئەوانەو تەنانەت ستافەکەشتان تەنها یەک دۆستی بۆ زیادکردوون؟!
بە-خۆ-داچوونەوەیەکی گشتی ڕا-نە-گەیەنن؛ دوادەکەون؛ زۆرباش دەدۆڕێن. چوونکە لە (١٩٨٠ ەوە تا ٢٠٢٢) عێراق لە جەنگی گەورەو یەکلەدوای یەکدا بوە؛ لەماوەی ئەم سێ ساڵەدا (٢٠٢٢ تا ٢٠٢٥) ئەو "سودانی" بەخێراییەکی زۆر گەورە ڕووی کردۆتە ئاوەدانی و بونیادنانی ژێرخان و بەهێزکردنی دامەزراوەکان (بەتایبەت لەبەغدای پایتەخت)؛ یان ئەوەیە لەگەڵی بە گفتوگۆ بڕۆ؛ ئەمە تەسلیمبوون نییە و بەپێی دەستور ئێمە عێراقیین و نوێنەرەکانیشتان لەوێن، یان ئەوەیە بۆ خۆت ستراتیژو دونیابیییەکی سەردەمییانە ساز بکە ( ئەوەش بە ماستاوچی و هەلپەرست ناکرێت؛ وەکو کەنداوییەکان بچن ئەقڵ لەدەرەوە هاوردە بکەن؛ با حکومەتەکەتان بۆ بەڕێوەببەن)، ئێ تۆ زبڵ دەخەیتە زانکۆ وە؛ زبڵخانە بەرهەم دێ نەک مەعریفە، پووش و پەڵاش دەکەیتە پەرلەمانتارو وەزیر "کا"و "با"و تەپ و تۆز دەرئەنجامەکەی دەبێت عەزیزم؛ هەی عەزیزم.