ئەو ئیجماع و کۆنەست و ئیرادەو دڵسۆزیەی دروست بوو بۆ کارەساتی ئاگرکەوتنەوەکەی ناوچەی کۆکۆیی ھەڵەبجە، لەحکومەت و پەڕلەمان و میدیاکاران و چین و توێژەکان و کەسایەتیەکان و تیمە خۆبەخشەکان، تا دەگاتە وەزیفەو کاری مەیدانی و بەرپرسیارانەی بەڕێزان پارێزگارو قائیمقامی ھەڵەبجە، کە بەشێوەیەکی نەسرەوت و دڵسۆزو خەمخۆر، لەناوجەرگەی ڕوداوەکاندابوون لەگەڵ تیمی خۆبەخش و پۆلیسی فریاکەوتن و ئەھل و عەشرەت، تاکاتی کۆنترۆڵکردنی ئاگرەکە شەووڕۆژ لەوێ بوون، گرنگە وانەو پەندی ئەخلاقی و سیاسیی لێوەرگرین و بۆ ھەڵەبجەش سەرمایەگوزاریی مرۆیی و مەعنەویی پێوە بکەین، لێرەوە پێشنیار دەکەم (جەنابی پارێزگار نوخشە ناسیح) ھەر بەو مۆتیڤ و ئیحساسە بەرزەوە لەگەڵ تیمەکەی، نەوەستێ و بچێتە بەغداو ڕاسپاردەو زیان و دەرخستەکانی ئەم کارەساتەو کۆی خەم و ژان و ئازارو داواکاریەکانی تری پارێزگاکەی بگەیەنێتە دەسەڵاتداران و لایەنی جێبەجێکارو یاسادانەرانی عێراق تا جارێکی تر ئەم ڕووداوانە دروست نەبنەوە.
ناوچەی ئاگرکەوتنەوەکەی پارێزگای ھەڵەبجە لەسازانەوە بۆ نەیجەڵەو تلێوەرێ و چنارو مۆردین و لمەو پێگەو ئاوەمارو قوڵی متکان تابەری سیروان و مەڕەخێڵ ناوچەگەلێکی فراوانی گرتەوە کە گەشتیاری و سروشتی و کشتوکاڵین، بەشی سەرەکی لەژێر کۆنترۆڵی فەرماندەیی پاسەوانی سنووری عێراقەو ئەوان دیدەوانیی دەکەن و حوکمی ئەکەن، ناوچەیەکی سەخت و شاخاوی و گەرمەسێرە، پڕلەوزەو سەوزایی و سەرچاوەی بەرھەم و بژێویی جوتیاران و ئاژەڵدارانەو بە سامانێکی میللی سروشتی دادەنرێت، ئێستا ئەو ھەمووە زیانەی بەرکەوتوە، دەبێ بۆ سەوزکردنەوەو ئاوەدانکردنەوەو ڕێگاوبانەکەی، بەشێوەیەکی فەرمی داوای قەرەبوو لە حکومەتی عێراقی بکرێت و پابەند بکرێ بەخێرایی بەدەم قوربانیەکانەوە بێن و بەیاساو بودجەی عێراق قەرەبووی زیانەکانی پارێزگای نۆزدەھەم بکەنەوە، کە بەدەرەجەی یەکەم ئەرکی حکومەتی مەرکەزییە ئینجا حکومەتی ھەرێم کە نازانرێ بۆچی ھێشتا تەندەرین بۆ دەستپێکردنی جادەی سازان ھەڵەبجە ناکەن و بڕیاری کۆتایی نادەن لەسەر ئەو پڕۆژەیە کە دەمێکە فەرمانە وەزاریەکەی دەرچوە.
پاشان پەڕلەمانتارو مەندوبەکانی کورد لەبری وێنەگرتن و بروسکەی ھاوخەمی بۆ کۆکردنەوەی دەنگ، پێویستە ھەرچی زووترە پڕۆژەیەک بۆئەو مەبەستە ئامادەبکەن و پاڵپشتی ڕاسپاردەو داواکاریەکانی پارێزگا تازەکەبن لەئەنجومەنی نوێنەرانی عێراق و داوای قەرەبووی زیانە ماڵی و ڕۆحیەکان بکەنەوە بۆ دانیشتوانی ناوچەکە بەگشتی.
دەسەڵاتی مەرکەزیی عێراق لەبری پڕۆژەی سەوزکردن و خزمەتی ژینگەیی و ئاوەدانکردنەوەی دارستان و پاوان و ڕەزو باخ و دەوەن و مەڕعاو لەوەڕگاکانی کوردستان چەندساڵێکە بێ ھیچ پلانێک دەستی کردوە بەپرۆسەی بەسەربازیکردن و تەجنیدی نھێنی و ئاشکرا لەسنورە شاخاویەکانی کوردستان، شاخ و چیاکانی پشتەوە لەباڵامبۆ تا شنروێ و بەفری میری و ھەورامان و شاخی شەرام و ڕەنگین و ئاسۆس بەشێکە لەو ستراتیژو پلانەو تەلبەندکراوەو دیدی عەسکەریزم برەو پێئەدات وەک سەردەمی حەرەس قەومیەکان و زەعیم سدیق تادەگات بە ھەژموونگەریی بەعسیەکان.
لەگەڵ ئەوەی حکومەتی عێراق، سوپاو فەرماندەییەکی وەک پاسەوانی سنور دروستکردوە لەو ناوچانە، دەبێ لەخەمی ئاوەدانکردنەوەی ناوچە کارەساتبارەکانیش بێ کاتێک ڕووداوێکی وەک ئاگرکەوتنەوەو تەقینەوە ڕووئەدات و دەبێ لەبری کڵاشینکۆف و تەلی دڕکاویی بێکەڵک کەرەستەی ئاگرکوژانەوەو تیمی فریاگوزاری و تەنانەت ھەلیکۆپتەری ئاگرکوژانەوەو ئۆتۆمبیل و ئەمبوڵانسی تایبەت و شاخاوی بخاتە بەردەستیان وەک ھێزی فریاگوزاریی ئامادە تا ناوچەکان ئارام و سەلامەت بن و ژینگەی کوردستان بەپارێزراویی بمێنێتەوەو سەدان باخ و بێستان و ڕەزو دارودەوەن و مێرگ و سەوزایی و مۆڵەگایەل و ئاژەڵداریی بەوجۆرە زیانیان پێ نەگات.