وتەبێژی پۆلیسی کۆمەڵگەیی عێراق ئاشکرای کرد، لەمساڵدا هەزار و ٥٥ حاڵەتی توندوتیژی دژی ژنان تۆمار کراوە، دەشڵێت: بەکارهێنانی ماددە هۆشبەرەکان و خواردنەوە کحولییەکانیش یەکێکە لە دیارترین و سەرەکیترین هۆکارەکانی توندوتیژیی.
ئاوێنە: عەقید موئەیەد هادی، وتەبێژی پۆلیسی کۆمەڵگەیی عێراق، سەبارەت بە زیادبوونی هۆکارەکانی توندوتیژیی دژ بە ژنان لە لێدوانێکدا بۆ ئاژانسی هەواڵی فەرمی عێراق ڕایگەیاند، لەمساڵدا لە پارێزگاکانی عێراقدا هەزار و ٥٥ حاڵەتی توندوتیژی دژی ژنان تۆمار کراوە.
ئاماژەی بەوەشکرد، بەکارهێنانی ماددە هۆشبەرەکان و خواردنەوە کحولییەکانیش یەکێکن لە دیارترین و سەرەکیترین ئەو هۆکارانەی کە بوونەتە هۆی بەرزبوونەوەی ئاستی توندوتیژیی خێزانی و توندوتیژی دژی ژنان بەتایبەتی.
جێگای ئاماژەیە، بەپێی ئامارە فەرمییەکان، لەماوەی سێ ساڵی ڕابردوودا لەعێراق، ٤٣ هەزار بازرگان و بەکارهێنەری ماددەی هۆشبەر دەستگیرکراون، کە ئەمەش ئاماژەیە بۆ زیادبوونی مەترسیداریی ئەو ماددەیە لە ناوچەکە.