ئەنجومەنی باڵای دادوەری عێراق ڕایگهیاند، دادگای لێکۆڵینەوەی رهسافه له دۆسیهیهكی گهندهڵیدا توانیویهتی زیاتر له بڕی 89 ملیار و 195 ملیۆن دینار بگهڕێنێتهوه خهزێنهی گشتی وڵات.
ئەنجومەنی باڵای دادوەری عێراق ئهمڕۆ چوارشهممه له ڕاگهیهندراوێكدا بڵاویكردهوه، دادگای لێکۆڵینەوەی رهسافه کە تایبەتە بە دەستپاکی و سپیکردنەوەی پارە و دۆسیەکانی تاوانی ئابوری، توانیویهتی بڕی 89 ملیار و 195 ملیۆن و 330 ههزار و 861 دینار گهڕاندهوه بۆ خهزێنهی گشتی وڵات.
ئاماژهی بهوهشكردوه، ئەو پارانە لەلایەن دەستەی تانەدان وەرگیراوەتەوە، کە بۆ پێداچونەوە بە تانەدان لە بڕیارەکانی کۆمیسیۆنی پەیوەندییەکان و ڕاگەیاندن پێکهێنراوە.
دادگەی لێکۆڵینەوەی دوەمی کەرخ سهرهتای ئهم ههفتهیه ڕایگهیاند، کۆی گشتیی ئەو پارەیەی لە دۆسیەکانی تایبەت بە تاوانەکانی سپیکردنەوەی پارە دەستیان بەسەرداگیراوە، گەیشتوەتە 93 ملیار و 668 ملیۆن و 979 ههزار و 124 دینار،
دادگەی لێکۆڵینەوەی کەرخ دهڵێت، رێکارەکانی لێکۆڵینەوەی دارایی توندتر کردوەتەوە، ئەوەش بوەتە هۆی زیادبونی ژمارەی ئەو دۆسیانەی کە بەپێی یاسای بەرەنگاربونەوەی سپیکردنەوەی پارە و پاڵپشتیی دارایی تیرۆر ژمارە 39ـی ساڵی 2015 تۆمارکراون.
عێراق بە بەردەوامی لە ڕیزبەندی گەندەڵترین وڵاتانی جیهاندایە و خراپ بەکارهێنانی دەسەڵات بە تایبەتی لە کەرتی نەوت و گازدا بڵاوبوەتەوە، چارەسەرکردنی ئەمە پێویستی بە چاکسازی یاسایی و دامەزراوەیی و بەرزکردنەوەی شەفافیەت هەیە.