وتەبێژی وەزارەتی دەرەوەی ئێران ڕایگەیاند: دەستوەردان لە كاروباری ناوخۆی وڵاتانی ناوچە، لەنێویاندا عێراق، پێشێلكارییەكی گەورەی بنەماكانی یاسای نێودەوڵەتییە، دەشڵێت: ناتوانین نیگەرانی خۆمان لە گواستنەوەی چەكدارانی داعش بۆ عێراق بشارینەوە و هیوادارین ئەو هەنگاوە زیان بە پەیوەندییەکانمان نەگەیەنێت.
ئاوێنە: ئیسماعیل بەقایی وتەبێژی وەزارەتی درەوەی ئێران لەبارەی گواستنەوەی چەکدارەکانی داعش بۆ عێراق لە كۆنگرەیەكی ڕۆژنامەنووسیدا ڕایگەیاند: دەستوەردان لە كاروباری ناوخۆیی وڵاتانی ناوچە، لەنێویاندا عێراق، پێشێلكارییەكی گەورەی بنەماكانی یاسای نێودەوڵەتییە.
وتیشی: سەبارەت بە هەڵبژاردنی سەرۆك وەزیرانی نوێی عێراق و تۆمەتباركردنی ئێران لەلایەن ئەمریكاوە، ئێمە بە پێچەوانەی ئەمریكاوە بڕیارمانداوە ڕێز لە بڕیارەكانی گەلی عێراق بگرین.
باسی لەوەش كرد: ئەوەی لەبارەی حوكمڕانی عێراقەوە ڕوودەدات، پەیوەندی بە عێراقییەكان خۆیانەوە هەیە، دەبێت ڕێگە بدرێت گەلی عێراق خۆی بڕیار بدات چ جۆرە حوكمڕانییەكی دەوێت.
ئەوەشی خستەڕوو: دەستوەردان لە كاروباری ناوخۆی وڵاتان بووە بە خوویەكی ناشیرینی بەرپرسانی ئەمریكا و ئەوەش جێگەی قبووڵكردن نییە.
ڕاشیگەیاند: ناتوانین نیگەرانی خۆمان لە گواستنەوەی چەكدارانی داعش بۆ عێراق بشارینەوە و هیوادارین ئەو هەنگاوە زیان بە پەیوەندییەکانمان نەگەیەنێت.