بەگوێرەی ڕاپۆرتێکی ڕۆژنامەی "فاینانشیاڵ تایمز"ی بەریتانی کە پشتی بە چەند سەرچاوەیەکی ئاگادار بەستووە، بنیامین نەتەنیاهۆ، سەرۆک وەزیرانی ئیسرائیل هەوڵەکانی چڕکردووەتەوە بۆ دەستپێکردنەوەی هێرشە سەربازییە بەرفراوانەکان بۆ سەر ئێران و بۆ ئەو مەبەستەش لە سەرەتای ئەم مانگەدا فەرمانی ڕاستەوخۆی بە سوپای وڵاتەکەی کردووە تاوەکو پلانی هێرشێکی نوێ و گەورە دابڕێژن.
پلانی هێرشەکەی ١٠ی ئۆکتۆبەر و ئامانجەکان
ئاوێنە: سەرچاوەکان ئاشکرایان کردووە کە سوپای ئیسرائیل لەسەر ڕاسپاردەی نەتەنیاهۆ، پلانێکی وردی بۆ هەڵمەتێکی بۆردومانکردنی چەند ڕۆژە دژی ئێران ئامادە کردبوو. بڕیار بوو ئۆپەراسیۆنەکە لە ١٠ی ئۆکتۆبەردا جێبەجێ بکرێت و تێیدا جگە لە دامەزراوە ئەتۆمییەکان، ژێرخانی مەدەنیی ئێرانیش بکرێتە ئامانج. بەپێی زانیارییەکانی ڕۆژنامەکە، قەبارە و توندیی ئەم پلانە نوێیەی ئیسرائیل بە جۆرێک داڕێژرابوو کە زۆر توندتر و بەرفراوانتر بێت لەو هێرشە هاوبەشەی ئەمریکا و ئیسرائیل کە لە مانگی شوباتی ڕابردوودا کرایە سەر ئێران. هەروەها بەرپرسانی ئیسرائیل بە پشتبەستن بە زانیارییە هەواڵگرییە نوێیەکان، لیستێکی نوێکراوەی ئامانجەکانیان لە ناوخۆی ئێراندا پێشکەش کردووە.
هۆکاری ڕاگرتنی هێرشەکە و هەڵوێستی ترەمپ
سەرەڕای ئامادەکارییە تەواوەکانی سوپای ئیسرائیل، پلانەکە لە کاتی دیاریکراوی خۆیدا جێبەجێ نەکرا. هۆکاری سەرەکیی ئەمەش دەگەڕێتەوە بۆ دژایەتی و ڕەزامەندینەدانی دۆناڵد ترەمپ، کە نەیویستووە بەر لە بەڕێوەچوونی هەڵبژاردنەکانی نیوەی خولی کۆنگرێس (Midterm Elections) لە ئەمریکا، جارێکی دیکە ململانێ سەربازییەکان سەرهەڵبدەنەوە. سەرچاوەکان جەخت لەوە دەکەنەوە کە لە کۆتاییدا بڕیاری کۆتایی بۆ ئەنجامدانی هەر هێرشێکی نوێ بۆ سەر ئێران، تەنها لە دەستی ترەمپدا دەمێنێتەوە.
ستراتیژیی فشار و ئەگەرەکانی داهاتوو
لە بەشێکی دیکەی ڕاپۆرتەکەدا ئاماژە بەوە دراوە، کە ڕەنگە ئەو ئۆپەراسیۆنەی سوپای ئیسرائیل لە سەرەتای ئەم مانگەدا پێشنیاری کردووە، بەشێک بووبێت لە هەوڵێکی ستراتیژی بۆ دروستکردنی فشار لەسەر تاران لە چوارچێوەی دانوستانەکاندا. لەم قۆناغەدا هاوکێشەکە لە نێوان دوو بژاردەدایە: "یان گەیشتن بە ڕێککەوتن، یان ئەنجامدانی هێرشی سەربازی". ئامانجی سەرەکیی ئەمریکاش لەم فشارانەدا ناچارکردنی ئێرانە بە قبوڵکردنی مەرجەکانی واشنتن، وەک بەشێک لە ڕێککەوتنێکی گشتگیر کە پەیوەستە بە دۆخی گەرووی هورمز و بەرنامە ئەتۆمییەکەی تارانەوە. لەگەڵ ئەوەشدا، سەرچاوەکان دووپاتی دەکەنەوە کە دەستپێکردنەوەی هێرشە هاوبەشەکانی ئیسرائیل و واشنتن بۆ سەر ئێران لە ماوەی چەند هەفتەی داهاتوودا، سیناریۆیەکی کراوەیە و بە هیچ شێوەیەک بەدوور نازانرێت.