دۆگمای حیزبی دو جۆرن. یان دۆگماکە بە دەرزی (ئامپول) خراوەتە مێشکی کەسێکەوە، یانیش ئەو ئینسانە وا ئەزانێ ئەگەر زیادەڕەوی لە بۆچونەکانی کرد، زۆر بە فەرمی قسەی کرد، هەمیشە چاکەت و پانتۆڵ و ڕیباتی لەبەر بو، ماستاوی باش سارد کردەوە و، هەمو کەسێکی غەیری حیزبەکەی (نەفی) کرد، ئیتر لای سەرکردایەتی حیزبەکەی خۆشەویستتر ئەبێت و، ئیحتیمالە خێرێکی پێبکەن و پۆستێکی بدەنێ.
کاک چیایی تەیمور، کە ئەڵێن ئەندامی پارلەمانی عێراقە و بە حساب کادری پێشکەوتوی پارتیشە، هەندێک قسەی کردوە لەسەر سلێمانی کە گوایا: سلێمانی خۆی بەخۆی ئەڵێت شاری هەڵمەت و قوربانی، ئەگینا خەڵکی دهۆک و هەولێر سلێمانی بە شاری هەڵمەت و قوربانی نازانن. ئێمەش وەک پارتی سلێمانی هەندێک مولاحەزە مان لەسەر قسەکانی کاک چیایی هەیە کە لەم گوتارە کورتەدا تەعبیری لێ ئەکەین:
سلێمانی پێویستی بە (OK) هەولێر و دهۆک نیە بۆ ئەوەی پێی بڵێن شاری هەڵمەت و قوربانی، وەک چۆن بارزان پێویستی بە (OK) هەولێر و دهۆک و سلێمانی نیە بۆ ئەوەی پێی بڵێن لانکەی شۆڕشگێڕانە. ئایا دهۆک بەو زەبەلاحیەی خۆی، ئەبێتە کۆڵانێکی قوڕاوی بارزان؟ ئایا سلێمانیش ئەتوانێت بەقەدە رهەورەبانی ماڵە هەژارێکی هەڵەبجە گەورە بێت؟
کاک چیایی نە پارێزگاری دهۆکە و نە پارێزگاری هەولێریشە. کاک چیایی شێخی تەریقەتێکی تایبەت بە دهۆک و هەولێر نیە. بۆیە لای ئێمە قسەکانی هیچ ئیعتیبارێکی نیە و قسەی کابرایەکی گێرەشێوێنە.
ئێمەی خەڵکی سلێمانی نەچوین عەریزەی (ئیخڵاس) بدە ینە دەوڵەتی عێراق و دەستی عەرە بی شۆڤێنیست ماچ بکەین، بەڵکو هەندێک لایەنی سیاسی لە زۆنی سەوز ئەوەیان کردوە. با کاک چیایی بچێت قسەکانی بەرەوڕوی ئەو لایەنە سیاسیە بکات، نەک هێرش بکاتە سەر سلێمانی. هەرچەنە شمشێر ڕاکێشان بە ڕوی یەکێتی لە دهۆکەوە هیچ ئازایەتیەکی تیا نیە.
بەرەوڕوبونەوەی داعش شەڕێکی قورس بو. من بڕوا ناکەم کاک چیایی یەک تاقە فیشەکی لە شەڕی داعشدا تەقاندبێت. کەچی بە هەمو ڕویەکەوە بەراوردی شەهیدی ناوچەی بادینان بە سلێمانی ئەکات.
ئەگەر کاک چیایی تۆزقاڵە زەڕڕەیەک شارەزایی لە نەخشەی جوگرافیایی شەڕی دژ بە داعش هەبوایە، دەبو بزانێت کە ئەوەندەی سنوری شەڕەکە لە هەولێر و دهۆکەوە نزیک بو، ئەوەندە لە سلێمانیەوە نزیک نەبو. هێزی پێشمەرگەی کوردستان لە کەرکوک و جەلەولا، سەعدیەو خانەقین کەم شەهیدی نەداوە. ئەگەر پێشمەرگەیەک شەهید بوبێت و خەڵکی زاخۆ، دهۆک، هەولێر، سلێمانی یان هەڵەبجە بونێت، چ جیاوازیەکی هەیە؟… خۆ داکۆکی کردن لە یەک نیشتیمانی هاوبەش پێشبڕکێی (موسابەقە) ژمارەی شەهید نیە. بەندە لە گەڵ زۆر خەڵکی تری سلێمانی، گەرمیان و هەڵەبجە لە شەڕەکانی، ڕەبیعە، سەدی موسڵ، شنگال و حەسەن شامدا بوین، لە پێشی پێشەوەی شەڕەکانیشدا بوین، بەس بڵێین چی شەهید نەبوین بۆ ئەوەی ڕەقەمی شەهیدی سلێمانی زیاد بکات…!
سلێمانی ٩ ی حوزەیرانی ساڵی ١٩٦٣ ی هەیە. بەدواداچون بۆ ئەم بەروارە بۆ کاک چیایی بەجێ ئەهێڵم.
سلێمانی ملازم موحسین و ئەمنە سورەکەی لە لایەن عارەبی فاشیستەوە بوە بە نسیب. تێگەیشتن لە مولازم موحسین و ئەمنە سورەکە بۆ کاک چیایی بە جێ ئەهێڵم.
ئەگەر کاک چیایی بە ڕاستی پارتیە، ئەوا نابێت بە پێچەوانەی گوتاری سەرۆک بارزانیەوە ئاخافتن بکات. جەنابیان ئەفەرمون: پارتیەکانی سلێمانی دو جار پارتین. سلێمانی بەس بریتی نیە لە پارتی. سلێمانی شارێکە بە دینامیکێکی بەهێزەوە. پارتیەکانی سلێمانی لە فەزای سیاسی و ڕۆشنبیری شاری سلێمانیدا پێگەیشتون و گەورەبون. پۆڵا بۆیە بەهێزە، چونکە لە نزیکی ١٦٠٠ پلەی سێلسی ئەتوێتەوە، سلێمانیش وەک پۆڵا وایە، خەڵکی سلێمانیش وەک پۆڵا وان، بە پارتیەکانیشیەوە. پارتی بون لە پارێزگای هەولێر و دهۆک (وەک ئێمەی سلێمانی ئەڵێین) زەڵاتەیە.
ئێمە شارچێتی ناکەین، بەڵام ئەم قسانەی کاک چیایی، کە کابرایەکی سیاسیە (چونکە ئەڵێن ئەندام پارلەمانە) بە هیچ جورێک قوبۆڵ ناکەین.
ئەگەر کاک چیایی حورمەتێکی بۆ ڕێبازی بارزانی تێدا مابێت و تەنیا بۆ مەسڵەحەت پارتایەتی نەکات، ئەوا ئەبێت زۆر بە ڕاشکاوانە داوای لێبوردن لە خەڵکی سلێمانی بکات. چونکە ئەم جۆرە گوتارانە ئەبنە هۆکاری نیفاق لە نێوان سۆران و بادینان.