سەبارەت بەخنکانی دو مناڵی تر لەناحیەی شەمامکی هەولێر
بەشدار عوسمان
2019-06-01
دانیشتیوانەکەی خەڵکانی راگوێزراوی دەشتی ھەولێرو قەراج‌و کەندێناوەن، بەھۆی حەوانەوەو داڵدەدانی پێشمەرگە لەساڵی ١٩٨٨ دەست بەسەر ماڵەکانیاندا گیراو خانوەکانیان روخێندران‌و رژێمی بەعس رایگواستن بۆ ئەو ناوچەیە .
بەو پێیەی باب و باپیرانمان لەم ناوچەیەدا ژیاون و خۆشم زیاتر لە یانزدە ساڵ لەئامادەیی شەمامک و دواتریش ناوەندییەکانی ناحیە و گوندەکانی مامۆستا بویم و رۆژانە لەگەڵ کێشە و گرفتەکانیان ئاشنا بویم، دەتوانم بڵێم فەرامۆشترین گەڕەک لەھەموو کوردستان،بێ نازترین گەنج لەھەموو عێراق،برسیترین مناڵ لەھەموو ھەولێر،بەدبەخترین ژن لەگوێی زەوی،لەم ناوچەیە دەژین، ناشیرینترین و ناخۆشترین خانو و دیزاین لەھەموو جیھان لێرەدا دەبینرێت !
زیاتر لە ١٠ کارگەی گەچ و کاشی و کەسارەی بەرپرسان ڕێک دەکەوێتە ناو ماڵەکان و گوندەکانی مامزاوە و قەتەوی و سەرکارێز،ھێندە تۆز و خۆڵ ھەڵدەمژن لە ٩٩% خەڵکی ناوچەکە و قوتابیان کێشەی گورچیلەیان ھەیە(یان رملیان ھەیە یان بەرد) وەکو دکتۆرەکانی بنکەی تەندورستیەکە لە راپۆرتی خۆیان بۆ قوتابیەکانمان ئاگاداریان دەکردینەوە ھۆکاری ئەمە بۆ ھەڵمژینی تۆز و خۆڵی کارگەکان دەگەڕێتەوە.
بۆ ئەوەی خەزێنەی چەند بەرپرسێک ئەستوورتر بێت،با پەنجا ھەزار کەس بمرێت و تووشی نەخۆشی دریژخایەن ببێت،ئەوە کەی کێشەی ئیدارەی شارە ..؟!
کارگەیەکی گەورەی ئاسن و شیش رێک لەنێو گوندی (گردمحمد)ی سەر بە ناحیەی شەمامک دامەزێندراوە، لەکاتی کارکردندا دوکەڵەکەی ھێندە چڕە لە پێنج مەتر چاو نابینێت،بەھۆی دوکەڵەکەیەوە قەمیسی سپی قوتابیەکان ھەمیشە مۆر دەردەکەوت !
پاشماوەی ئاوی پیسی نیوەی زیاتری ھەولێر بەناو ئەو ناوچەیەدا دەڕوات،بەبێ ھیچ مەجاری و سەرپۆشێک (بە کەندە پیسی ھەولێر ناسراوە)،ئەمە سەرەڕای بڵاوبوونەوەی دەیان نەخۆشی بەھۆی ئەو ئاوەوە و کۆبوونەوەی مێش و مەگەز و زیندەوەری زیانبەخش،ساڵانە چەندین قوربانی دڵتەزێنی وەکو خنکانی ( شێروان ھۆشیار و سەرکار مازن)ی لێدەکەوێتەوە .
لەکۆی زیاتر(١٥٠٠٠)ھەزار خێزانی نیشتەجێ بووی ناوچەکە،تەنھا بنکەیەکی تەندورستی ھەیە و سەرەتاترین پێداویستی پزیشکی تێدانیە،بیرمان نایەت تەنھا بۆ یەک رۆژ قوتابیەکمان ناردبێتە ئەو بنکەیە چارەسەری وەرگرتبێت!
بنکەی پۆلیس لە چەقی گەڕەکانی مامزاوە و نازماوە و مزا ئەحمەد و گردمحمد و سەرکارێز نیە، بەڵام لەم لاوە دوو ناوچە و ھەشت رێکخراو و چوار کۆمیتە ھەیە، دووکەڵ و تۆز و خۆڵی کارگەکان زوو زوو رەنگی ئالای سەر بارەگاکانیان دەگۆرێت !
بارەگایەکی گەورەی ئاسایش ھەیەو زیاتر لە کۆی فەرمانبەری دەزگا خزمەتگوزارییەکانی ناوچەکە کارمەندییان ھەیە، رۆژانە چالاکانە ھەڵدەسوڕین بۆ ترسان و تۆقاندنی خەڵکەکەی و کۆکردنەوەی زانیاری تەنانەت قوتابیە نارازییەکانیشمان لەم پەلاماردانە بێ بەش نەدەبوون و خۆمان شاھێدی دەیان حاڵەتی پەلاماردانی قوتابیەکانمان بوین.
نەبوونی ئاوی خواردنەوە، یەکێکە لە گرفتەکانی ئەو ناوچەیە بەتایبەت لە وەرزی ھاوین ھەموو ساڵێک دووبارە دەبێتەوە،بەھۆی پیسی ژینگەکەی و نەبوونی ئاوی پێویست نەخۆشی پێست یەکێکە لە نەخۆشیە بڵاوەکانە .
ماوەتەوە بڵێین، دانیشتیوانی ئەو ناوچەیە نمونەیەکن لە پاکی و دڵسۆزی و راستگۆیی و کۆڵنەدان، بەدەگمەنیش خێزانێک نادۆزیتەوە قوربانی گەورەی گیانی و مالی لەپێناوی ئازادی نەدابێت لەدەستی رژێمی بەعس، کەچی ئێستا ئەوە ژیان و گوزەرانیانە و دەستە بژێرێکیش لەوپەڕی نازو نیعمەتدا دەژین و مناڵ و نەوەکانیان دەستاین بەھەموو پێشکەوتنەکانی سەردەم دەگات و قاچیان ھەر رۆژێک لە وڵاتێکە بۆ گەشتوگوزار .